कैलाली अस्पताल अवार्डके मुख्य प्रायोजक
पहुरा समाचारदाता
धनगढी, २६ माघ । धनगढीमे हुइना दुसरा सुदूरपश्चिम स्पोर्टस अवार्डके मुख्य प्रायोजक धनगढीके कैलाली अस्पताल हुइल बा ।
नेपाल खेलकुद पत्रकार मञ्च कैलाली चैत ६ गते आयोजना कैना सुदूरपश्चिम स्पोर्टस अवार्डके मुख्य प्रायोजकके रुपमे कैलाली अस्पताल प्रालिसंग धनगढीमे पत्रकार सम्मेलन आयोजना करके सम्झौता करल बा ।
कैलाली अस्पतालके अध्यक्ष जनकराज जोशी ओ नेपाल खेलकुद पत्रकार मञ्च कैलालीके अध्यक्ष सीताराम ओझाबीच मुख्य प्रायोजन सम्बन्धमे सम्झौता पत्रमे हस्ताक्षर हुइल हो । अब दुसरा चो सुदूरपश्चिममे हुई लागल अवार्डके नाउँ कैलाली अस्पताल सुदूरपश्चिम स्पोर्टस रही ।
‘यी बार कोरोना भाइरसके महामारीके कारण अवार्ड आयोजनामे कठिनाई हुइटी रहल वर्तमान अवस्थामे मुख्य प्रायोजकके साथसे हम्रे हौसल बटी ।’ सम्झौता कार्यक्रमके पत्रकार सम्मेलनमे मञ्चके अध्यक्ष सीताराम ओझा कहलै– ‘हम्रे दुई ठो संस्करण आयोजनामेके मुख्य प्रायोजकके रुपमे साथ डेहलमे कैलाली अस्पतालहे धन्यवाद सहित अइना दिनमेफे अस्टे सहयोगके अपेक्षा करले बटी ।’
पत्रकार सम्मेलनमे अवार्डके मुख्य प्रायोजक रहल कैलाली अस्पतालके अध्यक्ष जनकराज जोशी अवार्डमे जोरना अवसर डेहलमे आयोजकहे धन्यवाद ज्ञापन करटी कहलै, ‘कोरोना कहरमेफे अवार्डसे निरन्तरता पैना बहुट खुसीके खवर हो । यी अवार्डहे सुदूरपश्चिमके पर्वके रुपमे आयोजना कैना आवश्यक बा ।’
मुख्य प्रायोजक कैलाली अस्पताल रहलमे अवार्डमे बर्ष पुरुष खेलाडीहे नवजिवन अस्पताल, वर्ष महिला खेलाडीहे नोभा अस्पताल, बर्ष युवा खेलाडीहे निसर्ग अस्पताल, स्पेशल अवार्डहे न्यू सिटी पोलीक्लिनीक, लाईफटाईम एचिभमेन्ट अवार्डहे सारथी अस्पताल, सुदूरपश्चिम आईकन पुरुषहे माया मेट्रो अस्पताल ओ महिलाहे तिवारी मेडिसिनसे प्रायोजन करले बटै । वर्ष प्रशिक्षक ओ बर्षके चर्चित खेलाडी विधाके लाग प्रायोजकके खोजी हुइटी रहल मञ्चके अध्यक्ष ओझा बटैलै ।
अवार्डके प्रवद्र्धकमे धनगढी उपमहानगरपालिका रहल बा । धनगढीके ओम प्यालेस अवार्डके भेनु पार्टनर रहल बा कलेसे गुरुकुल सेक्युरिटीसेफे अवार्डहे साथ डेले बा ।
