प्रदेश लिग हुइना

पहुरा समाचारदाता
धनगढी, २९ माघ । सुदूरपश्चिम प्रदेश लिग विफे ओ शनिच्चर हुइना बा । अखिल नेपाल फुटबल संघके कार्यक्रम अन्तर्गत सुदूरपश्चिम प्रदेश फुटबल संघके आयोजनामे कैलाली ओ कञ्चनपुरके जिल्ला च्याम्पीयन टोली बीच प्रदेश लिगके उपाधिके लाग प्रतिस्पर्धा हुई लागल हो ।

एन्फा अन्तर्गत आबद्ध रहल कैलालीके जिल्ला च्याम्पीयन निसर्ग स्टार सिटी युवा क्लब ओ कञ्चनपुरके जिल्ला च्याम्पीयन दीपज्योती युवा क्लबसे होम एण्ड अवेके आधारमे उपाधिके लाग एक आपसमे प्रतिस्पर्धा करे लागल महेन्द्रनगरमे आयोजित पत्रकार सम्मेलनमे प्रदेश फुटबल संघके महासचिव अमृत शाह जानकारी डेलै ।

बिफे दुनु टोली महेन्द्रनगर रंगशालामे प्रतिस्पर्धा करही । दुसर खेल धनगढीके जुगेडामे रहल मनकामना युवा क्लबके मैदानमे खेल्ही । प्रदेश लिगके उपाधि जित्न टोली सुदूरपश्चिम प्रदेशके प्रतिनिधित्व करटी एन्फा प्रेसिडेन्ट कपमे सहभागीता जनैही ।

होम एण्ड अवेके आधारमे प्रदेशके दुई जिल्लाके च्याम्पीयन टीमके बीचमे प्रदेश लिग हुई । सुदूरपश्चिम प्रदेशमे एन्फामे आबद्ध दुई ठो जिल्ला संघ रहल बा । कैलाली ओ कञ्चनपुरमे रहल जिल्ला च्याम्पीयन प्रदेश लिगमे सहभागीता जनैही । कैलालीसे जिल्ला च्याम्पीयन स्टार सिटी युवा क्लब हुइल बा कलेसे कञ्चनपुरसे दिपज्योती युवा क्लब हुइल बा ।

सुदुरपश्चिम प्रदेश लिग विजेता टोली देशके सातु प्रदेशके विजेता बीचमे हुइना प्रेसिडेन्ट कप खेली । ओम्ने उत्कृष्ट चारमे पर्न सफल हुइल चार प्रदेश राष्ट्रिय लिगमे सहभागीता जनैही । सहिद स्मारण ए डिभिजन लिगके उत्कृष्ट ६ ओ प्रेसिडेन्डट कपके उत्कृष्ट चार करके १० क्लबसे राष्ट्रिय लिगमे सहभागीता जनैना एन्फा जनैले बा ।

प्रदेश लिगके सक्कु तयारी पुरा हुइल प्रदेश फुटबल संघके अध्यक्ष दिनेश श्रेष्ठ जानकारी डेलै । चार लाखसे ढेर खर्च लग्ना अनुमान करल प्रतियोगितामे एन्फासे तीन लाख रकम सहयोग करी कलेसे अपुग रकम स्थानीयस्तरसे व्यहोरना हुइल बा । पत्रकार सम्मेलनमे प्रदेश लिगमे सहभागीता जनैना दुनु टोलीके जर्सी सार्वजनिक करल बा ।

कैलालीके जिल्ला च्याम्पीयन स्टार सिटी युवा क्लबहे धनगढीके हसनपुरमे रहल निसर्ग हस्पिटलसे प्रदेश लिग खेलके लाग साथ डेहल बा । निसर्ग अस्पतालसे मुख्य प्रायोजक हुके साथ डेहल हो । क्लबके नाउ आब निसर्ग स्टार सिटी युवा क्लब हुइल बा । ओस्टेक क्लबके सह–प्रायोजकमे एमएनएस ग्रुप रहल बा । २०७१ सालमे स्थापना हुूइल क्लब दुई चो जिल्ला च्याम्पीयन बनल बा ।

क्लबसे कुवेर सिंहके कप्तानीमे प्रदेश लिग खेल्न टीमके घोषणा करले बा । कञ्चनपुरके जिल्ला च्याम्पीयन दीप ज्योती क्लब दुई चो जिल्ला च्याम्पीयन हुइल बा । २०४७ सालमे दीपज्योती स्पोर्टस युवा २०६४ सालमे दीपज्योती क्लबके नामसे खेलकुदमे लग्टी आइल बा । हल्दुखालमे रहल क्लब कबड्डीके लाग बहुट चर्चित मानजाइठ ।