सेती अस्पतालमे बेड ओ अक्सिजन सहज हुइटी
धनगढी, १२ जेठ । सुदूरपश्चिम प्रदेशके रेफरल अस्पताल रहल धनगढीस्थित सेती प्रादेशिक अस्पतालमे कोरोनाके कहरसँगे बेड ओ अक्सिजनके हाहाकार हुइना करल कुछ दिन यहोर भर समस्या सहज हुइटी गिल बा ।
पाछेक एक सातासे अक्सिजन ओ बेड अभावमे कोइ फेन उपचारसे बञ्चित हुइ नैपरल सेती अस्पताल जनैले बा ।
जटिल समस्या हुइलेसे किल अस्पताल अइना प्रवृत्तिके कारण मृत्यु हुइनाके संख्या बह्रल सेती प्रादेशिक अस्पतालके सूचना अधिकारी दिलिपकुमार श्रेष्ठ बटैलैं । उहाँ अब्बे बेड ओ अक्सिजनके अभाव नैरहल बटैटी अक्सिजन नैपाके अभिनसम कोइ फेन ज्यान गुमाइपरना अवस्था नैरहल बटैलैं ।
समयमे बेड ओ अक्सिजन नैपाके संक्रमितके मृत्यु हुइटीरहल गुनासो अइटीरहल बेला सेती प्रादेशिक अस्पतालके फिजिसियन डक्टर निशान भट्टराइ निमोनियसे ग्रस्त हुके अस्पताल भर्ना हुइलहुक्रे मृत्युदर बह्रल बटैलैं । समयमे उपचारके लाग अस्पताल नैअइना अवस्थाके कारण कुछ दीर्घ रोगीहुकनके संक्रमणके कारण मृत्यु हुइल उहाँ बटैलैं ।
सुदूरपश्चिमके १२ अस्पतालके कुल बेड क्षमता ९४८ किल हो । यहाँके आइसियु क्षमता ६७, भेन्टिलेटर ३२, आइसोलेसन बेड संख्या ४६२, कोभिड बेड १२०, कोभिड आइसियु बेड ५५ तथा कोभिड भेन्टिलेटर संख्या २५ किल बा । बेड विस्तार ओ अक्सिजन आपूर्ति पाछेक समय सहज हुइटी गैल आत्तेपरना अवस्था नैरहल स्वास्थ्य अधिकारी बटैले बाटैं ।
संक्रमितहुक्रे समयमे उपचार ओ खानपिनमे ध्यान डेना हो कलेसे कोइ फेन संक्रमण हुइल कारण ज्यान गुमाइ नैपर्ना फिजिसियन डक्टर भट्टराईके सुझाव बा ।
अस्पताल प्रशासन ओ उपचारमे संलग्न चिकित्सकहुकनके कहाइहे आधार मन्ना हो कलेसे बेड ओ अक्सिजन अभावके कारण कोक्रे ज्यान गुमाइ नैपरठ ।
सेतीमे थप ३३ ठो अक्सिजन कन्सन्ट्रेटर जडान करलपाछे कोरोना संक्रमितहुकनके उपचारमे और सहजता अइना डेखाइल बा । साथे संक्रमण दरसँगे संक्रमणमुक्त हुइनाके संख्या फेन बह्रल ओरसे आगामी दिन थप सहज बन्टी जैना अधिकारीहुक्रे बटैठैं ।
