थप १६३९ जहनमे कोरोना पुष्टि, २०७८ जाने संक्रमणमुक्त

काठमाडौं, २९ असार । २४ घण्टामे देशभर १ हजार ६३९ जहनमे कोरोना संक्रमण पुष्टि हुइल बा । स्वास्थ्य तथा जनसंख्या मन्त्रालयके अनुसार मंगरके रोज टमान जिल्लामे करल ७ हजार ५८ पीसीआर परीक्षणमे १ हजार ६३९ जहनमे कोरोना पुष्टि हुइल हो ।

अस्टेक, ३ हजार ९५४ एन्टिजेन परीक्षणमे ७५९ जहनमे कोरोना संक्रमण डेखाइल बा । पीसीआर ओ एन्टिजेन परीक्षणसे कुल २ हजार ३९८ जहनमे संक्रमण पुष्टि हुइल मन्त्रालय जनैले बा । यीसँगे नेपालमे पीसीआर परीक्षणमे कोरोना डेखाइलके संख्या ६ लाख ५८ हजार ७७८ पुगल बा ।

अस्टेक, २४ घण्टामे २ हजार ७८ जाने कोरोना संक्रमणमुक्त हुइल बटैं । यीसँगे कोरोना संक्रमण हुके ठिक हुइनाके संख्या ६ लाख २३ हजार १०५ पुगल बा ।

मन्त्रालयसे डेहल जानकारी अनुसार देशभर करके थप १२ जहनके मृत्यु हुइल बा । यीसँगे नेपालमे कोरोनासे मृत्यु हुइनाके संख्या ९ हजार ४१२ पुगल बा ।