थप २३०९ संक्रमित, २१९७ जाने संक्रमणमुक्त
काठमाडौं, ९ सावन । बिटल २४ घण्टामे नेपालमे २ हजार ३ सय ९ जहनमे कोरोना भाइरस संक्रमण पुष्टि हुइल बा । स्वास्थ्य मन्त्रालयके अनुसार १० हजार ६२५ पीसीआर परीक्षणमे शनिच्चरके रोज थप २ हजार ३ सय ९ जहनमे संक्रमण पुष्टि हुइल हो । यी सँगे नेपालमे कोरोना भाइरससे संक्रमित हुइनाके संख्या ६ लाख ६७ हजार १७ पुगल बा ।
अस्टेक एन्टिजेन विधिसे करल ४ हजार २ सय ८५ परीक्षणसे ८ सय ५ जहनमे पोजिटिभ डेखाइल बा । २४ घण्टामे पीसीआर ओ एन्टिजेन विधिसे करल १४ हजार ९१० परीक्षणमे ३ हजार १ सय १४ जहनमे संक्रमण पुष्टि हुइल मन्त्रालय जनैले बा ।
पाछेक २४ घण्टामे थप २ हजार १ सय ९७ जाने संक्रमणमुक्त हुइल बटैं । हालसम ठिक हुइनाके संख्या ६ लाख ४१ हजार ५ सय ६५ रहल बा । नेपालमे कोरोना संक्रमणसे थप १६ जहनके मृत्यु हुइल बा । हालसम कोरोनासे मृत्यु हुइनाके संख्या ९ हजार ६९५ पुगल बा ।
हालसम देशभर ३५ लाख २८ हजार ५ सय १४ नमुनाके पीसीआर परीक्षण हुइल बा । क्वारेन्टाइनमे ३ सय ४४ जाने बटैं कलेसे आइसोलेसनमे रहल संख्या २७ हजार ७ सय ५७ बा ।
सेती प्रादेशिक अस्पतालके प्रयोगशालामे थप १९ मे संक्रमण पुष्टि
सेती प्रादेशिक अस्पतालके प्रयोगशालामे शनिच्चरके करल परीक्षणमे १९ जनहनमे कोरोना भाइरसके संक्रमण पुष्टि हुइल बा । उ प्रयोगशालामे १३९ नमूनाके परीक्षण करेबर १९ जनहनमे संक्रमण पुष्टि हुइल अस्पतालके सूचना अधिकारी दिलिपकुमार श्रेष्ठ जानकारी डेलै । ओस्टके १२० जनहनके रिपोर्ट निगेटिभ आइल बा ।
हाल अस्पतालमे २५ जाने संक्रमित उपचाररत रहल बाटै । जौन मध्ये ३ जाने संक्रमित आईसीयूमे उपचाररत रहल अस्पताल जनैले बा । ओस्टके शुकके ३ जाने बिरामी चोखाके घर घुमल बाटै कलेसे १० जाने अस्पताल भर्ना हुइल बाटै ।
