निर्मला हत्याके ३ वर्षः ‘न्याय पैना आस नैहो’
कञ्चनपुर, १० सावन । निर्मला पन्त हत्या घटनाके तीन वर्ष पुग्लेसे फेन दोषी पत्ता नैलागलपाछे परिवार न्यायके आस हेराइल बटैले बटैं । ‘जे जत्रा कलेसे फेन कोइ न्याय दिइ जस्ट नैलागठ,’ दुर्गादेवी पन्त आक्रोशित हुइटि कलि, ‘मोर पीडा बुझुइया कोइ नैहुइल ।’ उहाँ प्रहरीसे सरकार जत्रा परिवर्तन हुइलेसे फेन न्याय पैना आस हेराइल बटैलि ।
२०७५ सावन १० गते भीमदत्त नगरपालिका–१८, निम्बुखेडास्थित संघरियक घरमे गैल निर्मला बिहान महेन्द्रनगर–उलटाखाम सडकछेउ उखुबारीमे मृत अवस्थामे मिलल रहि । ओहे दिनसे निर्मलाके न्यायके लाग महिला अधिकारकर्मीसे लेके नागरिक समाजलगायत टमान संघसंस्था आन्दोलन सुरु करले रहे । ‘मोर कहल कोइ नैमानडेहल, मोर पीडा मोरसँग बा,’ निर्मलाके डाइ दुर्गा कलि, ‘आब कोइ न्याय डेहुइा फेन नैहो, मागम फेन नै, खाली भड्कुइया किल बटैं ।’ घटनाके २६ औं दिन भदौ ४ गते प्रहरी अभियुक्तके रूपमे सार्वजनिक करल भीमदत्त–१९, बाग्फाँटाके दिलीपसिंह विष्ट दोषी हुइट कटि छानबिनके लाग दुर्गा जिल्ला प्रहरी कार्यालयमे निवेदन डेले रहि । प्रहरी विष्टउप्पर पुनः छानबिन नैकरल उहाँक गुनासो बा । प्रहरीसे विष्टहे सार्वजनिक करलपाछे महेन्द्रनगरमे आन्दोलन और चट्कल रहे । वास्तविक अपराधी जोगाइक लाग प्रहरी नक्कली अपराधी खडा करल कटि स्थानीय आन्दोलन चट्कैले रहैं ।
२०७५ भदौ ८ गते प्रहरी आन्दोलनकारीउप्पर गोली चलाके भीमदत्त–१८, भगतपुरके शनि खुनाके मृत्यु हुइल रहे । अभिन फेन निर्मला घटनामे ठोस प्रमाणके खोजीमे रहल प्रहरी जनैले बा । जिल्ला प्रहरी कार्यालय कञ्चनपुरके डीएसपी सिद्धराज न्यौपानेके नेतृत्वमे अनुसन्धान चलटिरहल एसपी उमाप्रसाद चतुर्वेदी बटैलैं । ‘हम्रे इमानदार हुके अनुसन्धान करटि बटि,’ उहाँ कलैं, ‘अब्बे हमार अनुसन्धान सही दिशामे जाइटा ।’
जिल्ला प्रहरीसँगे केन्द्रीय अनुसन्धान ब्युरो ओ प्रदेश प्रहरीके टोली फेन घटनाके अनुसन्धान करटि बा । ‘अनुसन्धान तार्किक निष्कर्षमे पुग्न ठोस प्रमाण प्राप्त हुइ सेकल नैहो,’ एसपी चतुर्वेदी कलैं, ‘घटनास्थलके विश्लेषणके आधारमे अनुसन्धान करटि बटि, हम्रे बलगर प्रमाणके खोजीमे बटि ।’ उहाँ शंकास्पद कुछ व्यक्तिहे निगरानीमे रहल बटैलैं । निर्मला प्रकरणमे सडकसे संसद्सम आवाज उठल रहे । नेपाली काँग्रेसके जिल्लासे केन्द्रसमके नेताहुक्रे तत्कालीन सरकार अपराधी जोगाइ खोजल आरोप लगैले रहे । अब्बे काँग्रेस सभापति शेरबहादुर देउवाके नेतृत्वमे सरकार बनल बा । मने निर्मलाके डाइ दुर्गादेवी सरकार परिवर्तन हुइलेसे फेन न्याय पैना आस मरसेकल बटैले बटि ।
‘अनुसन्धानके लाग कत्रा एसपी, डीएसपी फेरलैं,’ उहाँ कलि, ‘अब्बे सरकार फेरल बा, हमारे क्षेत्रके नेता प्रधानमन्त्री हुइल बटैं, मने न्याय पाइम कना आस नैहो ।’
