थारु भाषक कविता प्रतियोगिता हुइल
पहुरा समाचारदाता
धनगढी, ११ सावन । थारु भाषा साहित्य संरक्षण ओ सम्वद्धनके लाग थारु भाषक कविता प्रतियोगीता हुइल बा । प्रतियोगीता एकपरगा डट कमके आयोजनामे हुइल हो ।
प्रतियोगितामे पहिल, डुसरा ओ टिसरा क्रमश: अर्जुन थारु ‘अल्लु’ (बर्दिया), लाहुराम चौधरी ‘जहर’ (कैलाली), असिराम डंगौरा (कैलाली) हुइल बटैं । ओस्टके प्रोत्साहन स्वरुप अर्जुन चौधरी (बर्दिया) हुइल बटैं ।
कविता प्रतियोगिता असार १७ गतेसे ३१ गते सम कविता पठैना समय टोकल रहे । रीत पुगल आठ जहनके कविता प्रतियोगिमे समावेश कैगिल रहे । बाँकी रीत नैपुगल पाँच जहनके कविता समाबेश करे नैसेकगैल आयोजक जानकारी डेले बा ।
बिजेता ओइन पहिलाहे ३,०००, डुसराहे २,५०० ओ टिसराहे २,००० ओ सान्त्वनाहे १,५०० रुपिया डेना आयोजक जनैले बा । प्रतियोगिताके निर्णायकमे साहित्यकार टोपेन्द्र शाह ओ सागर कुश्मी रहिंट । अइना दिनमे अस्टेअस्टे कार्यक्रम कर्टि जैना एकपरगा डटकमके संचालक राम प्रसाद चौधरी बटैलैं । प्रतियोगिनके कविता एकपरगा डट कममे प्रकासित कर्ना आयोजक बटैले बा ।
बिजेतनहे पुरस्कारके लाग यिहे सावन ३० गते भिट्टर एकपरगा डट कमके कार्यलय धनगढीमे सम्पर्क करे पर्ना बा ।
