कोभिड खोपके लाग अनलाइन मार्फत नाउँ दर्ता

धनगढी, ११ सावन । धनगढी उप–महानगरपालिकासे कोभिड खोप लगैना कार्यहे व्यवस्थित करक लाग घरदैलोमे नै पुगके नाउँ दर्ता करे लागल बा ।

अनलाईन मार्फत नाउँदर्ताके लाग उप–महानगरपालिकासे १९ वडामे स्वयंसेवक परिचालन करले बा । कोभिड खोप लगैनासे कोइ नवञ्चित हुइट कहिके घरमे पुगके १८ बरससे उप्परके उमेर समूहके नाउँ दर्ता सुरु करल धनगढी उप–महानगरपालिकाके नगरप्रमुख नृपबहादुर वड बटैलै । उहाँ कहलै, ‘नाउँदर्ता पाछे खोप लगैना कार्य फेन व्यवस्थित हुइना बा ।’

धनगढी उप–महानगरपालिकासे सावन ६ गतेसे घरघरमे पुगके अनलाईन नाउँदर्ता अभियान सुरु करल रहे नगरप्रमुख वड कहलै, ‘ अब्बे ४० जाने यूवा स्वयंसेवकहे घरदैलोमे पुगके अनलाईन नामदर्ता करटी रहल बाटै ।’

सावन मसान्तसम धनगढी उप–महानगरपालिकासे १ लाख ५० हजार जनहनके नाउँ दर्ता कैसेक्ना लक्ष्य लेहल बटैले बा । वडाके साथे जिल्ला प्रशासन कार्यालय कैलाली, जिल्ला मालपोत, सेती प्रादेशिक अस्पताल, धनगढी उप–महानगरपालिका परिसर ओ धनगढी चौराहामे समेत अनलाईन नाउँ दर्ताके लाग स्वयंसेवक खटल बाटै ।