वीर अस्पतालभित्तर स्वास्थ्यकर्मी ओ प्रहरीबीच झडप
काठमाडौं, १७ सावन । वीर अस्पतालके स्वास्थ्यकर्मी ओ कर्मचारीसे करल प्रदर्शनमे प्रहरीसे हस्तक्षेप करलबेर झडप हुइल बा ।
अस्पतालके प्रशासकीय अधिकृत डा. जागेश्वर गौतमविरुद्ध प्रदर्शनमे उत्रल स्वास्थ्यकर्मी ओ कर्मचारीहे प्रहरी लाठीचार्ज करके घाहिल बनाइल आन्दोलनरत कर्मचारी दीपक मुडभरी बटैलैं । झडपमे ४ जाने घाहिल हुइल बटैं ।
सरकार कोभिड–१९ नियन्त्रणसम्बन्धी अध्यादेश नान्के वीर अस्पतालहे कोभिड युनिफाइड अस्पताल बनैना घोषणा करके डा. गौतमहे प्रमुख नियुक्त करले रहे । मने टबसे अस्पतालके सेवामे कौनो सुधार नैहुइल बरु आर्थिक अनियमितता हुइल कटि स्वास्थ्यकर्मी ओ कर्मचारी प्रदर्शनमे उत्रल हुइट ।
उहाँहुक्रे आठ महिनासे कोभिड–१९ जोखिम भत्ता लगायतके टमान भत्ता नैपाइल फेन बटैले बटैं । आठ महिनासे रुकल सेवा विस्तार भत्ता, औषधि उपचार भत्ता, कोभिड–१९ जोखिम भत्ता नैपाइल कर्मचारीहुक्रे बटैले बटैं ।
