भेरोसेलके दोसर डोज सावन २२ गतेसे देशभर
काठमाडौं, २० सावन । सरकार कोरोनाविरुद्धके भेरोसेल खोपके दोसर डोज डेना अभियान सावन २२ गतेसे देशभर सञ्चालन करेक लाग बा ।
असार २९ गतेसे ५५ वर्ष वा उहिनसे उप्परके व्यक्तिहुकनहे भेरोसेलके पहिल डोज डेहल रहे । पहिल डोज लेहल २१ दिनभित्तर दोसर डोज डेहेपरठ ।
स्वास्थ्य मन्त्रालयके सचिवस्तरीय निर्णयअनुसार सावन २२ गतेसे दोसर डोज लगैना अभियान सुरु हुइना हुइल ओरसे ओहे अनुसार अभियान सञ्चालन करना मन्त्रालयसे ७७ ठो जिल्लाके स्वास्थ्य कार्यालयहे अनुरोध करले बा ।
हालसम खोप लगैना बाँकी रहल व्यक्तिहुक्रे स्वास्थ्य मन्त्रालयके वेभसाइटमे जाके अनिवार्य अपन विवरण इन्ट्री करेपरना बा । ओकेर आधारमे किल लक्षित समूहभित्तरके व्यक्तिहे खोप डेना व्यवस्था करना मन्त्रालय कले बा ।
अस्टेक विदेश जैना नेपाली नागरिकहे क्यूआर कोडसहितके कोरोना खोप लगाइल विद्युतीय प्रमाणपत्र उपलब्ध करैना काम कीर्तिपुरस्थित राष्ट्रिय आयुर्वेद अनुसन्धान तथा तालिम केन्द्रसे सावन २० गतेसे सुरु करल बा ।
यी काम काठमाडौं उपत्यकालगायत अन्य जिल्लामे फेन विस्तार करना ओ खोपके मात्रा पूरा करल सब व्यक्तिहुकनहे क्रमशः क्यूआर कोडसहितके विद्युतीय प्रमाणपत्र डेना मन्त्रालय जनैले बा ।
