भाइरल जुरीके बिरामी बह्रलै
डोटी, २० सावन । जिल्ला अस्पताल डोटीमे अब्बे भाइरल जुरीके बिरामीके सङ्ख्या ह्वात्तै बढल बा । अस्पतालके मेडिकल सुपरिटेण्डेन्ट एवं कार्यालय प्रमुख कृष्ण जोशीके अनुसार विगत पाँच–सात दिनसे जिल्ला अस्पतालमे भाइरल जुरीके बिरामीके सङ्ख्या बह्रल हो ।
जिल्ला अस्पतालमे उपचार कराई आइल बिरामीमन्से ६०–७० प्रतिशत बिरामी भाइरल जुरी हुइना करल उहाँ बटैलै । उहाँ कहलै, ‘जिल्ला अस्पतालमे दैनिक औसतमे कम्तीमे फे ४० से ५० जनहनसम भाइरल जुरीके बिरामी उपचारके लाग अना करल बटै, अब्बे भाइरल जुरीके बिरामी ह्वात्तै बढल बटै ।’
कुछ दिनसे जिल्लामे वर्षासंगे अत्यधिक गर्मी बढल ओ वातावरणमे आइल परिवर्तनसे मनैनमे भाइरल जुरीके प्रकोप डेखल अस्पताल जनैले बा । मौसम परिवर्तनके कारण मनैनके शरीरमे अत्यधिक गर्मी हुइल ओ शरीर तातुल रहल बेला अचानक पानीमे भिज्ना वा जुर पदार्थ पिलेसे शरीर तापक्रम अनुकूल रूपमे मिलाई नइसेक्के ‘इन्फेक्सन’ हुके भाइरल ज्वरो हुइना करल शेलेश्वरी अस्पताल दिपायलके डा ललितकुमार लिम्बू बटैलै ।
शैलेश्वरी अस्पतालमेफे दैनिक ५० से ६० जनहनसम भाइरल जुरीके बिरामी अइना करल अस्पतालके निर्देशक आइजङग कुँवर जानकारी डेलै । ओस्टेक करके यहाँके और निजी पोलिक्लिनिक तथा मेडिकलमे समेत उ रोगके बिरामीके सङ्ख्या बढल स्वास्थ्यकर्मी बटैठै ।
भाइरल जुरी आइल बिरामी नइअटैना, झोल पदार्थ ढेर खैना, सफा पानी पिना, खानपिन ओ सरसफाइलगायतके जनस्वास्थ्यके मापदण्डमे ध्यान डेना स्वास्थ्यकर्मी सक्कुहुनमे आग्रह करले बटै ।
