विद्युत प्राधिकरणसँग क्षतिपूर्ति माग
पहुरा समाचारदाता
राजापुर, २१ सावन । गैल असार ३० गते राजापुर नगरपालिका वडा नम्बर २ जोतपुरमे विद्युतके कारण सिर्जित क्षतिके जोतपुर सम्बद्ध टमान संघसंस्था क्षतिपूर्तिके माग करले बा ।
बुधके रोज जोतपुर बरघरके नेतृत्वमे ३ लाख ४० हजार ६ सय १५ रुपैयाँ बराबरके क्षतिपूर्ति माग करल बा । क्षतिपूर्ति ज्ञापनपत्रमे जोतपुर गाउँके १ सय १७ घरमे क्षतिपूर्ति पुगल तथ्यांकमे उल्लेख बा ।
उ ज्ञापनपत्र जंग्रार साहित्यिक बखेरीके अध्यक्ष एवं युनिक नेपालके कार्यक्रम संयोजक सोम डेमनडौरा पह्रलैं कलेसे जोतपुरके बरघर वीरेन्द्र दहित विद्युत प्राधिकरण वितरण शाखा राजापुरके कार्यालय प्रमुख शशिकान्त अधिकारीहे बुझैले रहैं ।
ज्ञापनपत्रमे लिखल बा, जोतपुर बरघर समितिसे क्षतिके अवस्थाके बारेमे लेहल तथ्यांकके आधारमे क्षतिपूर्ति सम्बोधन करजाए, समय समयमे विद्युतके कारण हुइना क्षति रोक्न विद्युतीय व्यवस्थापन तत्काल करजाए, विद्युतीय प्रवाह तथा विद्युतीके ट्रान्सफार्म समय समयमे अनुगमन तथा मर्मत करजाए । अस्टेक, बिजुलीके मुख्यतारके लाइन टुटलबेला जोरेबेर विद्युतके कर्मचारीसे हरेक घरधुरीसे ५० रुप्याके दरसे उठाइल उ व्यथिति रुके ।
विद्युत कार्यालयसे कर्मचारीहुकनके गतिविधिके अनुगमन करनाके साथे हरेक गाउँमे या कार्यालयमे गुनासो संयन्त्रके व्यवस्था करजाए । पोलसे घरमे मिटर जडान करेबेर या तार टुटल अवस्थामे विद्युत प्राधिकरणके कर्मचारीसे लेना करल ५ सय रुप्याबारे विद्युतसे बिल भपाई डेजाए या लेना बन्द हुइपरल ।
ज्ञापनपत्र हस्तान्तरण पश्चात विद्युत प्राधिकरण वितरण केन्द्र, राजापुरके कार्यालय प्रमुख अधिकारी प्राविधिक समस्या हुइल मने अप्ने क्षतिपूर्तिके लाग केन्द्रसँग पहल करना बाट बटैलैं । उहाँ विद्युतके मिटर जडानके बेला ओ मुख्य तार जोरनाके बेलामे कर्मचारीसे रकम उठाइल कना बाट अपनहे पटा नैरहल बटैलैं । अधिकारी अइसिन कौनो अनियमितता हुइलेसे अपनहे तुरुन्त खबर करना आग्रह करले बटैं ।
क्षतिपूर्ति माग सम्बन्धि ज्ञापनपत्र बुझैना टोलीमे राजापुर नगरपालिकावडा नम्बर ६ के वडाध्यक्ष महेश चौधरी, बर्दियाली थारु विकास मञ्चके अध्यक्ष तथा थरुहट÷थारुवान युवा शक्तिके केन्द्रीय संयोजक सीताराम थारु, ग्रामीण युवा विकास समाजके अध्यक्ष बिमल चौधरी, सुम्मत कृषि सहकारी संस्थाके अध्यक्ष रघुराम थारु लगायतके सहभागीता रहल रहे ।
असार ३० गते जोतपुरमे विद्युतके गडबडीसे हरेक घरमे बल्ब, मोबाइल चार्जर, ल्यापटप चार्जर, पानीमोटर, सिलिङ पंखा, स्ट्यान्ड पंखा, टेबल पंखा, बोर्ड, मल्टिप्लक, कार्यालयके प्रिन्टर, सिसिटिभी क्यामरा, सिसिटिभी क्यामराके चार्जर नष्ट हुइल रहे । यी घटना दोसर चो हो । यी समस्या काल्हके दिनमे भारी जनधनके क्षति हुइसेक्ना सम्भावना बह्रल बा । अस्टेक, एक घरमे आगी लागेवला हुइल रहे ।
