तत्काल परीक्षा नैकरना स्वास्थ्य मन्त्रालयके सिफारिस
काठमाडौं, २२ सावन । स्वास्थ्य तथा जनसंख्या मन्त्रालय कोरोना संक्रमण बह्रटिरहल ओरसे कक्षा १२ सहित सब परीक्षा तत्काल नैकरना सीसीएमसी (कोभिड–१९ संकट व्यवस्थापन केन्द्र) ओ शिक्षा मन्त्रालयहे सिफारिस करले बा ।
कक्षा १२ के परीक्षा सावन ३१ से सञ्चालन करना परीक्षा तालिका सार्वजनिक हुसेकल बा ।
स्वास्थ्य मन्त्रालय विज्ञहुकनसँगके छलफलपाछे परीक्षा सञ्चालन करना उपयुक्त नैहुइल सिफारिस करल हो । मृत्युदर १.५ ओ संक्रमितके दर फेन बह्रटिरहल ओरसे परीक्षा सञ्चालन नैकरेपरना स्वास्थ्य मन्त्रालयके अडान बा ।
’संक्रमण बह्रटिरहल बा । यी अवस्थामे परीक्षा लेलेसे और कर्रा हुइसेक्ना कहिके हम्रे सुझाव डेले बटि,’ स्वास्थ्य सचिव डा. रोशन पोखरेल कलैं ।
यी विषयमे प्रधानमन्त्री शेरबहादुर देउवा ओ स्वास्थ्य राज्यमन्त्री उमेश श्रेष्ठबीच छलफलसमेत हुइल रहे । प्रधानमन्त्री देउवा फेन अवस्था सामान्य हुइलबाद ओ यी उमेर समूह (२० वर्षटरेक किशोरकिशोरी) खोप पाइलपाछे किल परीक्षा सञ्चालन करना डेखाइल स्रोत जनैले बा ।
यिहेबीच स्वास्थ्य राज्यमन्त्री उमेश श्रेष्ठ फेन कोरोना बह्रलओरसे सब परीक्षा स्थगन करना शिक्षा मन्त्रालय ओ कोभिड–१९ संकट व्यवस्थापन केन्द्रहे सिफारिस करल बटैले बटैं ।
शिक्षा मन्त्रालय राष्ट्रिय परीक्षा बोर्डहे परीक्षा रोक्न निर्देशन डेहल स्रोत जनैले बा । परीक्षा स्थगितके निर्णय राष्ट्रिय परीक्षा बोर्डसे करेपरना रहठ ।
