भ्वाइस अफ नेपाल सिजन–३ के उपाधि किरण गजमेरहे
काठमाडौं, २४ सावन । किरण गजमेर भ्वाइस अफ नेपाल सिजन–३ के विजेता बनल बटैं । शनिच्चर रात सम्पन्न ग्रान्ड फिनालेमे प्रतिस्पर्धी ज्वाला राई, आर्यन तामाङ ओ तारा श्रीष मगरहे पाछे परटि गजमेर विजेता बन्न सफल हुइल हुइँट् ।
टिम प्रमोद(खरेल)के गजमेर फिनालेमे मन्त्र ब्यान्डके ’हिमाली नेपाली’ बोलके गीतमे प्रस्तुति डेले रहैं । विजेता हुइलसँगे उहाँ नगद २५ लाख रूपैयाँ फेन प्राप्त करलैं ।
उहाँ झापाके खुदुनाबारी शरणार्थी शिविरमे जन्मल हुइट । भुटानसे सर्वस्व त्यागके उहाँक परिवार नेपाल आइल रहे ।
हाल अमेरिका बैठ्टि आइल किरण भ्वाइसके ट्रफी उचालके अपने नेपाली नागरिकता पाइलजस्टे अनुभव हुइल प्रतिक्रिया डेलैं । ’मै नागरिकता पैले नैहुँ । मने यी ट्रफी नागरिकता हो मोर लाग,’ किरण कले बटैं ।
भ्वाइसके कार्यक्रममे गायिका प्रविशा अधिकारी, राजेश पायल राई गायन प्रस्तुति डेले रहैं ।
