अमेरिका ओ बेलायतसे अपन नागरिकहे तत्काल अफगानिस्तान छोरना आग्रह
काठमाडौं, २३ सावन । अफगानिस्तानसे अमेरिकी नेतृत्वमे रहल विदेशी सैनिकके फिर्ता प्रक्रिया बह्रलपाछे तालिवान विद्रोही अपन गतिविधिहे देशभर बह्राइल ओ यकर कारण सुरक्षा अवस्था बिग्रल कटि संयुक्त राज्य अमेरिका ओ बेलायत अपन नागरिकहे तत्काल अफगानिस्तान छोरना आग्रह करले बटैं ।
अफगानिस्तानके सुरक्षा अवस्था कमजोर बनल ओरसे अन्तर्राष्ट्रिय आतंकवादी समूहसे अफगानिस्तानमे अपन नागरिकहुकनहे लक्षित आक्रमण हुइ सेक्ना चिन्ता बेलायतके विदेश मन्त्रालय प्रकट करले बा ।
काबुलस्थित अमेरिकी राजदूतावास तत्काल हवाइ टिकट खरिद करे नैसेक्ना अवस्थामे रहल अपन नागरिकहे ऋण उपलब्ध करैना समेत जानकारी करैले बा । अमेरिका अपन नागरिकहुकनहे व्यापारिक उडानसे लौटना ओ दूतावाससे करना आपत्कालीन उद्धारमे भर नैपरना आग्रह करले बा ।
स्थानीय अधिकारीहुकनके अनुसार तालिवान लडाकुहुक्रे निम्रोज प्रान्तके राजधानी जारञ्जउप्पर नियन्त्रण कायम करले बटैं । उहिनहे सरकारी फौजके निम्ति भारी धक्काके रूपमे हेरल बा ।
दक्षिण–पश्चिमी अफगानिस्तानके उ शहर तालिबान लडाकुहुकनके नियन्त्रणमे गैइल पहिल प्रान्तीय राजधानी बनल बा । तालिवान लडाकू समूहके आबके निशानामे दक्षिणी शहर कान्दहार ओ लश्कर गह रहल डेखाइल बा ।
शुकके रोज ट्विटरमे एक पोस्ट करटि तालिबान लडाकुहुक्रे इरानी सीमासँग जोरल एक महत्वपूर्ण व्यापार केन्द्र जारञ्जउप्पर कब्जा करल दाबी करले रहे ।
