सरकार सञ्चालनके न्यूनतम साझा कार्यक्रम ओ कार्यविधि सार्वजनिक
काठमाडौं, २४ सावन । सरकार सञ्चालनके लाग सत्तारुढ गठबन्धनके कार्यदलसे तयार करल न्यूनतम साझा कार्यक्रम ओ कार्यविधि प्रतिवेदन सार्वजनिक हुइल बा । प्रधानमन्त्री तथा मन्त्रिपरिषद्के कार्यालय सिंहदरबारमे अँट्वार आयोजित एक कार्यक्रमबीच प्रधानमन्त्री शेरबहादुर देउवा ओ सत्ता गठबन्धनमे रहल दलके नेताहुकनसे प्रतिवेदन सार्वजनिक करल हो ।
कार्यक्रममे कार्यदल संयोजक एवं नेपाली काँग्रेसके महामन्त्री पूर्णबहादुर खड्का साझा कार्यक्रम ओ कार्यविधि वाचन करले रहैं ।
सत्तारुढ दलके शीर्ष नेताहुक्रे, मन्त्रीहुक्रे ओ कार्यदलके संयोजकलगायतके अँट्वार बिहान प्रधानमन्त्री निवास बालुवाटारमे बैठकसे प्रतिवेदनहे अन्तिम रुप डेहल रहे ।
कार्यदल गैल शुकके रोज प्रधानमन्त्री देउवालगायत शीर्ष नेतृत्वहे प्रतिवेदन हस्तान्तरण करले रहे । प्रतिवेदनमे संयुक्त सरकारके प्राथमिकताहे समावेश करल बा । प्रतिवेदनमे कोभिड–१९ से उत्पन्न महाविपत्तिसे मुक्ति, राष्ट्रियहितके सम्वद्र्धन, संघीयताके कार्यान्वयन ओ संघीय लोकतान्त्रिक गणतन्त्रके सुदृढीकरण, शान्ति सुरक्षाके प्रत्याभूति, सुशासन ओ सदाचार, शान्ति प्रक्रियाके पूर्णता, आर्थिक नीति तथा कार्यक्रम, सामाजिक रुपान्तरण, तत्कालिक राहत पुनःनिर्माण तथा पुनःस्थापना, पर्यावरणीय सन्तुलन ओ अन्तर्राष्ट्रिय सम्बन्धलगायतहे प्राथमिकता डेहल बा ।
सरकारके प्रमुख प्राथमिकतामे रहल कोरोना रोकथाम ओ नियन्त्रणके विषयहे प्रतिवेदनमे मुख्यरूपमे समेटल बा । गठबन्धनहे कैसिक दीगो बनैना कना विषय फेन प्रतिवेदनमे समावेश करल बा । वर्तमान सरकारमे मन्त्रीसे पालना करेपरना आचारसंहिताहे समेत प्रतिवेदनमे समावेश करल बा । काँग्रेसके महामन्त्री खड्का संयोजक रहल सात सदस्यीय कार्यदलसे प्रतिवेदन तयार पारल हो ।
