त्रिविके हाल सञ्चालित कौनो फेन परीक्षा नैरुक्ना
काठमाडौं, २४ सावन । त्रिभुवन विश्वविद्यालयसे हाल सञ्चालन हुइटिरहल कौनो फेन परीक्षा नैरुक्ना बटैले बा ।
परीक्षा नियन्त्रक पुष्पराज जोशीके अनुसार अँट्वार बैठल त्रिवि कार्यकारी परिषदके बैठकसे हाल सञ्चालन हुइटिरहल परीक्षामे विद्यार्थी संख्या कम रहल ओरसे स्वास्थ्य मापदण्ड पालना करके परीक्षा सञ्चालन करना निर्णय करल जानकारी डेलैं ।
‘अब्बे सञ्चालन हुइटिरहल परीक्षामे विद्यार्थी संख्या कम रहल ओरसे नियमित करना ओ आब हुइना परीक्षा भर स्थिति अनुसार विकल्पमे जाइ सेक्ना मेरिक निर्णय करले बटि,’ उहाँ कलैं ।
त्रिविसे सञ्चालन करटिरहल वार्षिक परीक्षा सावन २९ गते ओ सेमेष्टर प्रणालीके परीक्षा भदौ ५ गते ओराइटा ।
कोरोना संक्रमितके संख्या बह्रलपाछे कक्षा १२ के परीक्षा स्थगित करल बा कलेसे अन्य परीक्षा फेन रोकेपरना आवाज उठल बा ।
मने त्रिवि भर धेर विद्यार्थीके परीक्षा ओराइल ओरसे ओ बाँकी परीक्षा डेना विद्यार्थीके संख्या कम रहल ओरसे स्वास्थ्य मापदण्ड पालना करके परीक्षा डेलेसे जोखिम नैहुइना बटैले बा ।
