चिसापानीमे २२ जनहनहे डेंगु संक्रमण
पहुरा समाचारदाता
लम्की, १० भदौ । कैलालीके लम्कीचुहा नगरपालिका वडा नम्बर ३ चिसापानीमे डेंगु रोगके २२ जाने नयाँ संक्रमित फेला परल बाटै ।
चिसापानीमे एकपाछे औरे डेंगु रोग डेख परे लागलपाछे बिफेक रोज चिसापानीमे एक दिने निःशुल्क डेंगु रोग परिक्षण शिविर सञ्चालन करले रहे । उ शिविरमे संकास्पद एक सय जनहनके परिक्षण करेबर २२ जनहनमे संक्रमण डेख परल लम्कीचुहा नगरपालिका स्वास्थ्य शाखा प्रमुख जयन्ती बिसी जानकारी डेली । उहाँ १४ महिला ओ ८ पुरुष सहित २२ जनहनमे डेंगु संक्रमण डेख हो । चिसापानीके करीब ३ दर्जन ढिउरहे इहीसे आघे संक्रमण डेखपरल रहे । कोइ चोखासेकल बाटै कलेसे कोइ उपचारत रहल जनाइल बा ।
चिसापानीके अधिकांश विरामीनमे डेंगुरोग डेखपरे लागलपाछे लम्कीचुहा अस्पतालमे समेत विरामी भरी भराउ हुइल बा । अस्पतालमे भर्ना हुइल ढिउर जैसिन विरामी वडा नम्बर ३ के चिसापानीके रहल अस्पतालके इञ्चार्ज डाक्टर प्रकाश तिमिल्सैना बटैलै ।
चिसापानी क्षेत्रमे महामारीके रुपमे डेंगु डेखपरे लागलपाछे लम्कीचुहा नगरपालिका स्वास्थ्य शाखाके आयोजना, वडा नम्बर ३ के समन्वय, लम्कीचुहा अस्पतालके प्राविधिक सहयोग ओ जिल्ला स्वास्थ्य कार्यालय कैलालीके किट सहयोगमे संकास्पद विरामीहुक्रनके डेंगु रोग परिक्षणके लाग शिविर सञ्चालन करल हो ।
शिविर सञ्चालनमे लम्कीचुहा वडा नम्बर ३ के वडा अध्यक्ष भक्तबहादुर चलाउने, वडा सदस्य दिलमाया थापामगर, लम्कीचुहा स्वास्थ्य शाखा प्रमुख जयन्ती बिसी, लम्कीचुहा अस्पतालके सदस्य सचिव तथा स्वास्थ्यकर्मी गंगाराम उपाध्याय, लम्कीचुहा अस्थाई कोभिड अस्पताल ब्यावस्थापक प्रमुख स्वास्थ्यकर्मी तप्त भण्डारी, स्वास्थ्यकर्मी शंकर शाही, समाजसेवी जनक शाही, भरत जिसी लगायत शिविर सञ्चालनमे सहयोग तथा सहजिकरण करल रहिट ।
इहीसे आघे एकपाछे औरे डेंगुके विरामी संख्या बह्रटी गैलपाछे रोग न्यूनीकरण तथा नियन्त्रणके लाग मच्छरीनके अण्डा ओ लार्भा नष्ट कनैना, वयश्यक मच्छर मारक लाग बिषादी छिट्ना काम कैसेकल लम्कीचुहा नगरपालिका वडा नम्बर ३ के वडाध्यक्ष भक्तबहादुर चलाउने जानकारी डेलै ।
