दार्चुलामे बाढपहिरोमे ३ के मृत्यु, २ बेपत्ता
धनगढी, १४ भदौ । लगातारके वर्षासँगे अँट्वार रात दार्चुलामे आइल बाढ ओ पहिरोसे ३ जहनके मृत्यु हुइल बा कलेसे २ जाने बेपत्ता हुइल बटैं ।
बाढपहिरोसे घर भठके जिल्लाके दुहु गाउँपालिका–१, बासपालिकाके नरसिंह महर ओ उहाँक गोसिनिया कौशा महरके मृत्यु हुइल बा । रातके सुटल अवस्थामे घरउप्परसे गिरल पहिरोसे उहाँहुकनके मृत्यु हुइल दार्चुला प्रहरी प्रमुख डीएसपी मनोहरप्रसाद भट्ट बटैलैं ।
अस्टेक, दुहु गाउँपालिका–५, दुल्लामे बाढसे मनुवा डडालके फेन मृत्यु हुइल बा । बाढसे घरजग्गासहित झोलुंगेपुल ओ मोटरेबलपुल तथा जलविद्युत, पानीघट्ट ओ पशुचौपायामे समेत क्षति पुगल बा । दुहुमे पाँचठो पसल, दुईठो लघु जलविद्युत् आयोजना, चारठो झोलुंगे पुल ओ एक पक्की पुल फेन पुहल डीएसपी भट्ट बटैलैं ।
अस्टेक ओहे गाउँपालिके वडा नम्बर ३ निजाङगाडमे बाढसे दुई जाने बेपत्ता बटैं । निजाङगाड खोलाके बाढसे स्थानीय शेरसिंह कार्की ओ हरकसिंह कार्की बेपत्ता हुइल स्थानीय दिलिपसिह कार्की जानकारी डेलैं ।
निजाङगाडके खोला दार्चुला–तिंकर सडक मोटरेबल पुल, दुईठो झोलुंगे पुल पुहैले बा । यी क्षेत्रमे रहल आधादर्जन घर तथा पसल पुहल बा । दार्चुला तिंकर सडक खण्डके निजाङगाड पुल पुहके दुहँु ओ व्याँस गाउँपालिकाके सम्बन्ध विच्छेद हुइल बा ।
अस्टेक, महाकाली नगरपालिका १ के श्रीबगडमे देवबहादुर बम, अमरबहादुर बम, सुन्दरबहादुर बम ओ जीतबहादुर बमके होटल तथा पसल पुहल बा ।
अस्टेक, निजाङगाड खोला लग्गे रहल अपिनाम्पा संरक्षण क्षेत्र कार्यालयके रेन्जपोष्ट भवनके आधा भाग पुहैले बा । घट्नास्थलमे नेपाल प्रहरी, सशस्त्र प्रहरी, नेपाली सेना, रेडक्रस ओ स्थानीयहुकनसे उद्दार कार्य हुइटा । रातके २ बजेसे आइल बाढसे श्रीबगड क्षेत्रमे खेतबारी नोक्सान करले बा । वारपार जैना डगर नैहुके स्थानीयहे उद्धारमे समस्या हुइल बा ।
