गौरीगंगामे लागल ताला खुलल
पहुरा समाचारदाता
चौमाला, १ कुवाँर । कैलालीके गौरीगंगा नगरपालिकामे सोम्मारसे लगाइल तालाबन्दी पाचौँ दिन कार्यपालिका सदस्यहुकनके अपिलमे खुलल बा ।
गठबन्धनके दलहुक्रे नगरपालिकामे डेखल अनियमितताके यथार्थ छानबिन करके सार्वजनिक कैना माग करटी नगरपालिकामे करल तालाबन्दीप्रति नगरप्रमुख भीम बहादुर देउवा कौनो चासो नइदेखाइलपाछे कार्यपालिका सदस्यहुक्रे उचित मागके सम्बोधन कैना प्रतिबद्धतासहित ताला खोल्न अपिल करलपाछे शुकके ताला खुलल हो ।
समस्या समाधानके लाग समिति बनैना विषयमे सहमति हुई नइसेक्के लम्बल तालाबन्दी सेवाग्राहीहुकनहे पर्ना प्रत्यक्ष असरहे मध्यनजर करटी सदस्यहुकनके अपिलमे ताला खोलल नेपाली काँग्रेस नगर सभापति काशीराम शर्मा बटैलै ।
नगरप्रमुखके संरक्षणमे अनियमितता भ्रष्टाचार ओ बेथिति बढल कहटी पाँच राजनीतिक दलहुक्रे करल अनिश्चितकालीन तालाबन्दी शुकके खुलल हो ।
नगरपालिकामे आर्थिक बर्ष २०७६/०७७ ओ २०७७/०७८ के नदिजन्य पदार्थके आयव्यय, राजस्व, कृषि शाखा, स्वास्थ्य शाखा, शिक्षा शाखा ओ नगरपालिकाके गाडीके आयव्यय, बेरुजु रकम लगाइल बिषयमे कार्यपालिका सदस्यके संयोजकत्वमे पाँच राजनीतिक दलके जनप्रतिनिधि कार्यपालिका सदस्यके प्रतिनिधित्व हुइना करके सात सदस्यीय छानविन समिति यिहे कुुुवाँर ६ गते बैठना कार्यपालिका बैठकसे कार्यान्वयनमे नन्ना सहमतिमे तालाबन्दी खोलल कार्यपालिका सदस्य भक्तबहादुर विक जानकारी डेलै ।
