विद्युत प्राधिकरण सुदूरपश्चिम कार्यालयमे तालाबन्दी
पहुरा समाचारदाता
अत्तरिया, ४ कुवाँर । सेवा करारमे जथाभावी कर्मचारी भर्ना करल कहटी नेपाल विद्युत प्राधिकरण सुदूरपश्चिम प्रादेशिक कार्यालय अत्तरियामे तालाबन्दी करल बा ।
सेवा करारमे कार्यरत कर्मचारी ओ युवा संघ कैलालीसे संयुक्त रुपमे सोम्मारके दिनके कार्यालयमे तालाबन्दी करल हुइट । प्रादेशिक कार्यालय सहित प्राधिकरण मातहतके निकायमे सेवा करारमे कार्यरत इहीसे आघेक कर्मचारीहे जानकारी समेत नैडेके आर्थिक असुली कैटी आपन मनमानी करल कहटी तालाबन्दी करल हो ।
धनगढी वितरण केन्द्रमे सेवा करारमे प्राविधिक हेल्परके रुपमे कार्यरत समिर खड्का पुरान कर्मचारीहे जानकारी समेत नैडेके विद्युत प्राधिकरण ओ निर्माण व्यवसायीसे जथाभावी रुपमे कर्मचारी भर्ना करल कारण बाध्य होके तालाबन्दी करल बटैलै ।
‘काम सिक सेकल पुरान कर्मचारीहे निरन्तरता डेहे परल कना हमार माग हो मने प्राधिकरण ओ ठेकेदारसे रकम असुली कैटी निकटके व्यक्तिहे भर्ना कैके अनियमितता करले बावै,’ खड्का कहलै, ‘फारम भर्ना सूचना समेत नैडेके हमारउपर अन्याय करल बा । यम्ने हमार गम्भीर ध्यानाकर्षण हुइल बा ।’ करार सेवाके लाग आह्वान करल आवेदन फारम भर्दा समेत विभेद करल उहाँके गुनासो रहल बा ।
अनियमित तरिकासे फारमके शुल्क लेना काम समेत हुइल कहटी उहाँहुक्रे समानता कायम कैना माग करले बाटै ।
नेपाल विद्युत प्राधिकरणसे भर सेवा करारके कर्मचारी सम्झौता बमोजिम ठेक्का लेहल सम्बन्धित निर्माण व्यवसायीसे भर्ना कैना हुइल ओरसे कार्यालयसे खासै सरोकार नै रहना बटैले बा ।
प्रादेशिक कार्यालयके निमित्त प्रमुख मेघमणि गौतम इहीसे आघे दुइ बरसके लाग करल ठेक्काके अवधि ओराइलपाछे डिलस मल्टी सेक्युरेटीसँग सम्झौता करल बटैटी कर्मचारी भर्ना फेन उहे करल बटैलै ।
