निबन्ध लेखन तथा चित्रकला प्रतियोगिता
पहुरा समाचारदाता
कञ्चनपुर,१० कुवाँर । बालअधिकार चेतना समूहसे इन्सेक धनगढीके सहयोगमे विद्यालयस्तरीय विद्यालय स्तरीय निबन्ध लेखन तथा चित्रकला प्रतियोगिता करले बा ।
अनौपचारिक क्षेत्र सेवा केन्द्र (इन्सेक) सुदुपश्चिम प्रदेश कार्यालय धनगढीसे कञ्चनपुर जिल्लामे संचालित स्थानीय समुदायहे सचेत परटी जिम्मेवार निकायहे जवाफदेही बनैना कार्यक्रम अन्तर्गत पुनर्वास नगरपालिकाके विजय माध्यमिक विद्यालयमे गठित बालअधिकार चेतना समूहसे अँट्वारके रोज निबन्ध लेखन तथा चित्रकला प्रतियोगिता करल हो ।
कोरोना महामारीसे शिक्षा क्षेत्रमे पारल प्रभाव विषयक निबन्ध लेखन प्रतियोगितामे कक्षा नौ से १२ सम अध्ययनरत ११ जाने विद्यार्थी प्रतिस्पर्धा करले रहिट । विद्यार्थीनहे कोरोना महामारीसे शिक्षा क्षेत्रमे पारल प्रभाव विषयमे १५० शब्द नइघटाके निबन्ध लिखे लगाइल रहे ।
शिक्षकहुकनके मुल्याङकन समिति मार्फत मूल्यांकन करके कक्षा १० के छात्र किरन सुनार पहिल, कक्षा १२ के छात्रा पुनम मगर दुसरा ओ कक्षा दशके छात्रा सरीवती सुनार टिसरा स्थान हासिल करले बटै । उहाँहुकन विद्यालय व्यावस्थापन समितिके अध्यक्ष कर्णबहादुर बिष्टमार्फत पुरस्कार वितरण करल रहे ।
ओस्टेक चित्रकला प्रतियोगितामे कक्षा ५ से आठसमके ९ जाने प्रतिस्पर्धा करले रहिट । ओइनहे अपन विद्यालयके चित्र बनाई लगाइल रहे । मूल्यांकन समितिसे प्रकाशित करल नतिजा अनुसार कक्षा ८ के छात्रा आयूष्मा नेपाली पहिल, कक्षा ७ के छात्र तेज बिष्ट दुसरा ओ कक्षा ७ के छात्र योगेन्द्र सावद टिसरा स्थान हासिल करले बटै । ओइनहे विद्यालयके प्रअ भवानीदत्त अवस्थी मार्फत पुरस्कार वितरण करल रहे ।
बाल अधिकार चेतना समूहके संरक्षक शिक्षक लोहीत भट्टराई बालअधिकार चेतना समुह मार्फत विद्यालयमे टमाख अतिरिक्त क्रियाकलाप, सरसफाई कार्यक्रम संचालन हुइटी आइल ओरसे दइसिन क्रियाकलापके निरन्तरताके लाग इन्सेकसंग आग्रह करलै ।
