थारु कोटा काटके ३५ प्रतिशत महिला, २० प्रतिशत युवा, १५ प्रतिशत दलित ओ ५ प्रतिशत मुस्लिमहे नेतृत्वमे नन्ना
पहुरा समाचारदाता
धनगढी, ११ कुँवार । नेपाल कम्युनिष्ट पार्टी (माओवादी केन्द्र) से भरखर अपन विधानमे निर्वाचन आयोगके व्यवस्था करटि निर्वाचन मार्फत सक्कु तहमे ३५ प्रतिशत महिला, २० प्रतिशत युवा, १५ प्रतिशत दलित ओ ५ प्रतिशत मुस्लिमहे नेतृत्वमे नन्ना निर्णय करले बा । कलेसे थारु जातिके कोटा उल्लेख नैकरले हो ।
सोम्मारके रोज धनगढीमे माओवादी केन्द्रसे आयोजित पत्रकार सम्मेलनमे माओवादी केन्द्रके निर्वाचन आयोग अध्यक्ष विष्णुपुकार श्रेष्ठ विद्यानबारे जानकारी डेटि पार्टीके एतिहासिक निर्णय हुइल बटैलैं ।
माओवादी केन्द्रसे अपन पार्टी इतिहासमे पहिलचो छुट्टे स्वतन्त्र ओ स्वयत्त आयोग गठन करके आन्तरिक निर्वाचन सञ्चालन कैना स्वच्छ ओ निष्पक्ष निर्वाचन मार्फत सक्कु तहमे ३५ प्रतिशत महिला, २० प्रतिशत युवा, १५ प्रतिशत दलित ओ ५ प्रतिशत मुस्लिमहे नेतृत्वमे नन्ना जानकारी डेहल रहिट ।
ओहे बीच पत्रकारहुकनके थारु जनजाति छुटल कि कना प्रश्नके जवाफ डेटि अध्यक्ष श्रेष्ठ कलैं, ‘खुला, महिला ओ युवा भित्तर थारु जनजाति समेट जिना ओरसे विद्यानमे उहाँहुकनके अलग्गे प्रतिशत नैछुट्याइल हो ।’
आयोगके अध्यक्ष श्रेष्ठ कलैं, ‘पार्टी आयोगहे पूर्णता डेहलबाद पूर्ण बैठक बैठके हम्रे कार्य सम्पादन नियमावली, निर्वाचन नियमावली ओ निर्वाचन आचारसंहिता २०७८ पारित करसेकले बटि । आसन्न निर्वाचनहे मध्यनजर करके १५ गतेसम सक्कु वडा, गाउँपालिका, नगरपालिका, प्रदेशस्तरीय निर्वाचन समिति गठन करसेकब ।’
प्रदेश १, बागमती, गण्डकी, कर्णाली ओ सुदूरपश्चिम प्रदेशमे प्रदेशस्तरीय प्रशिक्षण सम्पन्न हुसेकल आयोग जनैले बा । पार्टीके निर्वाचन सम्पन्न करना करिब ४० हजार स्वयंसेवक परिचालन करना बटागिल बा ।
माओवादी केन्द्र पार्टीके निर्वाचन आयोग देशभरसे २ लाख ८५ हजार व्यक्ति निर्वाचित हुइना दावी करले बा ।
