‘समाज रुपान्तरणके लाग सामाजिक सचेतीकरण आवश्यक’
पहुरा समाचारदाता
धनगढी, १३ कुँवार । सुदूरपश्चिम प्रदेशके सामाजिक विकासमन्त्री लालबहादुर खड्का सामाजिक सचेतना बहै्रटि व्यक्तिहे आर्थिक रूपमे सवलीकरण नैकरटसम समाज रुपान्तरण नैहुइना बटैले बटैं ।
दलित सेवा संघके आयोजनामे बुधके रोजसे सुरु हुइल दुई दिने प्रदेशस्तरीय दिगो विकास लक्ष्य स्थानीयकरण सम्बन्धी कार्यशाला गोष्ठीके उद्घाटन करटि सामाजिक विकासमन्त्री खड्का दिगो विकास प्राप्तिके लाग शिक्षा, स्वास्थ्य, रोजगारी, आर्थिक सवलीकरणमे प्रदेश सरकार अग्रसर रहल बटैलैं ।
उहाँ कलैं, ‘सुदूरपश्चिम प्रदेश सरकार दिगो विकासके लक्ष्य हासिल करेक लाग पहिले प्राविधिकसँगे व्यावसायिक शिक्षाके अवधारणा नन्ले बा ।’ प्राविधिकसँगे व्यावसायिक शिक्षाके अवधारणा सफल हुइलेसे आर्थिक विकास हुइना उहाँ विश्वास व्यक्त करलैं ।
कार्यक्रममे प्रदेश सभा सदस्य दुर्गा विक समाज रुपान्तरणके लाग कानून बनाके प्रभावकारी रुपमे कार्यान्वयन करेपरना जोर डेलि । उहाँ दिगो विकास लक्ष्य प्राप्तिके लाग सामाजिक रुपान्तरण हुइ परना बटैलि ।
अस्टेक प्रदेश सभा सदस्य अक्कल रावल कौनो व्यक्ति सत्ता ओ शक्तिमे पुगल महत्वके विषय नैहो, समाज परिवर्तन हुइलेसे किल विकास हुइना बटैलैं । उहाँ नेपाल समावेशीमे सवल रहल दावी करटि समावेशीमे किल सफलता प्राप्त नैहुइना हुइल ओरसे अधिकारके लाग अभिन आन्दोलन हुइटि रहल बटैलैं ।
कार्यक्रममे संविधान सभा सदस्य हरि श्रीपाइली समाज परिवर्तनके लाग बृहत छलफल करेपरना आवश्यक रहल बटैलैं । हम्रे जा सिख्ले बटि उ अन्यमे हस्तान्तरण करेपरठ ।
वस्तीअनुसारके अधिकार प्राप्त बा कि नैहो कहिके हेरेपरना उहाँ बटैलैं । कार्यक्रममे दिगो विकास लक्ष्य राष्ट्रिय संजाल नेपालके दयासागर श्रेष्ठ दिगो विकास लक्ष्यसम्बन्धी कार्यपत्र प्रस्तुत करले रहैं ।
उहाँ दिगो विकास लक्ष्यमे विश्वव्यापी समस्या, विश्वव्यापी लक्ष्य, विश्वव्यापी सूचक लगायतके बारेमे जानकारी करैले रहैं ।
दलित सेवा संघके केन्द्रीय अध्यक्ष ईश्वरीप्रसाद विकके अध्यक्षतामे हुइल कार्यक्रम संघके कैलाली जिल्ला अध्यक्ष जगत विश्वकर्मा स्वागत करल रहैं । कलेसे संघके चित्र विश्वकर्मासे सञ्चालन करल कार्यक्रममे डीसीएके जग्दिश भट्टलगायत शुभकामना मन्तव्य व्यक्त करले रहैं । दलित तथा महिलाहुकनके समान अधिकारके लाग स्थानीय लोकतन्त्र सवलीकरण परियोजना अन्तर्गत कार्यक्रम हुइल रहे ।
