चाडपर्वमे विशेष सुरक्षा योजना: कैलालीके ८ ठाउँमे यात्रु सहायता कक्ष
पहुरा समाचारदाता
धनगढी, २० कुवाँर । डशिया, डेवारी ओ छठ पर्वके अवसरमे जिल्ला प्रहरी कार्यालय कैलाली विशेष सुरक्षा योजना अपनैटी कैलालीके ८ ठाउँमे यात्रु सहायता कक्ष स्थापना करले बा ।
डशिया डेवारी लक्षित सुरक्षा योजना बमोजिम कैलाली जिल्लाके त्रिनगर, मालाखेती, लम्की, टिकापुर, चिसापानी, सुख्खड ओ सडकपुरमे यात्रुहुकनके सहज आवतजावत तथा सुविधाके लाग यात्रु सहायता कक्ष स्थापना करल जिल्ला प्रहरी कार्यालय कैलालीके प्रमुख विश्व अधिकारी जनैलै । ओस्टेक नम्मा यात्रा कैना सवारी साधनके लाग २ ठाउँमे रिफ्रेस सेन्टरफे स्थापना करल उहाँ जनैलै ।
मंगरके रोज कैलालीके धनगढी उप–महानगरपालिका वडा नं ४ स्थित बसपार्कमे रहल यात्रु सहायता कक्षके एक कार्यक्रम विच विधिवत उदघाटन करटी प्रहरी उपरीक्षक विश्व अधिकारी चाडपर्वमे टमान कारणसे यात्रु ठगुवा पैना अन्य समस्यामे पर्ना ओरसे कोईफे यैसिन मेरिक कृयाकलाप नइकैना नइकरैना आग्रह करलै । उहाँ कहलै,–‘यदि कोई किउ यात्रुहुकनहे अनावश्यक दुखः हैरानी डेना जैसिन क्रियाकलाप करलेसे कानून बमोजिम कारवाही कैजाई ।’
‘जिल्लाहे दुई भागमे विभाजन करटी विशेष सुरक्षा योजना लागु करल बा,’ प्रहरी प्रमुख कहलै, –‘ भिडभाड हुइना डसिया, डेवारी ओ छठ लगायतके संवेदनशील पर्वके बेला हुइसेक्ना चोरी, डकैती, ठगी लगायतके आपराधिक गतिविधिहे ध्यान डेटी विशेष सुरक्षा योजना लागु करल बा ।’
जिल्लाभर सादा पोसाकके प्रहरी लगायत टमान कमाण्ड पोष्टके प्रहरी करके जिल्ला भर करिब साढे सात सयके हाराहरिमे प्रहरी खटैले बटी कलेसे सीमा नाकामे सुरक्षाकर्मीसंगे तालिम प्राप्त कुकुर परिचालन ओ ड्रोनसेफे निगरानी कैना योजना बनाइल उहाँ बटैलै ।
चाडपर्वके बेला कैलाली जिल्लाभर तत्काल परिचालन करल जनशक्ति पर्याप्त नइहुइलेसेफे धनगढीमे रहल प्रदेश प्रहरी कार्यालय, दंगा नियन्त्रण कार्यालय तथा सशस्त्र प्रहरी गणसे थप जनशक्ति माग करटी जिल्लाबासीहे शान्तिपूर्ण तरिकासे चाडपर्व मनैना वातावरण बनैना प्रहरी उपरीक्षक अधिकारी बटैलै ।
जिल्ला ट्राफिक प्रहरी कार्यालय कैलालीके कार्यालय प्रमुख प्रहरी निरीक्षक विरेन्द्र बोहरा, सुदुरपश्चिम यातायात प्रा.लि.के कोषाध्यक्ष गोविन्द शाह यात्रु सहायता कक्ष संचालनपाछे यात्रुहुकनके सरल ओ सहज यात्रामे सहयोग पुग्न बटैलै । ओस्टेक यातायात व्यवसायी कोईफे कानून विपरितके क्रियाकलाप नइकैना आग्रह करले बटै ।
