शिक्षा, स्वास्थ्य, खाद्य ओ आवास अधिकारके सवालमे अन्तरक्रिया
पहुरा समाचारदाता
कञ्चनपुर, २० कुवाँर । अनौपचारिक क्षेत्र सेवा केन्द्र (इन्सेक) सुदुपश्चिम प्रदेश कार्यालय धनगढीसे कञ्चनपुर जिल्लामे संचालित स्थानीय समुदायहे सचेत परटी जिम्मेवार निकायहे जवाफदेही बनैना कार्यक्रम अन्तरगत पुनर्वासके शिक्षा, स्वास्थ्य, खाद्य ओ आवास अधिकारके सवालमे अन्तरक्रिया करले बा ।
कार्यक्रममे मानव अधिकार समुहसे पुनर्वास नगरपालिका क्षेत्रमे पहिचान करल शिक्षा, स्वास्थ्य, खाद्य तथा आवास अधिकारसंग सरोकार रख्न खासखास सवाल ओ समस्या इन्सेक सहजकर्ता कैलाश पनेरु छलफलके लाग प्रस्तुत करले रहिट ।
कार्यक्रममे मानव अधिकार समुहसे पहिचान करल शिक्षा, स्वास्थ्य, खाद्य तथा आवास अधिकारसंग सरोकार रख्न मुख्य मुख्य सवाल तथा समस्या समाधान करेक लाग पुनर्वास नगरपालिकाके ध्यान आकर्षण करैटी मानव अधिकार समुहके संयोजक पर्शुराम विश्वकर्मा नगर प्रमुख जीवनराज थापाहे ध्यान आकर्षणपत्र बुझैले रहिट ।
ध्यान आकर्षण पत्र बुझ्टी नगर प्रमुख थापा मानवअधिकार समुहसे पहिचान करल समस्या तथा सवाल मन्से कतिपय सवाल नगरपालिकासे सम्बोधन करसेकल ओ बाँकी रहल सवाल समेत हाली संम्वोधन कैना प्रतिबद्धता जनैटी मानवअधिकार समुहसे नगरपालिकाके महत्वपुर्ण सवाल तथा समस्या औल्याडेहलमे मानव अधिकार समुहके साथे इन्सेकहे धन्यवाद ज्ञापन करलै ।
पुनर्वास नगरपालिकाके सामुदायिक विद्यालयके आधारभुत तहमे बालबालिकाके संख्या न्यून रहल ओ माध्यामिक तहमे बालबालिकाके संख्याअधिक रहल, कतिपय मर्च करे पर्ना विद्यालयहे टमान खाले विवादके कारण मर्च करे नइसेकल कारणसे विद्यालयमे बालबालिकाके अनुपातमे शिक्षकहुकनके व्यवस्थापन कैना समस्या हुइटी रहल उहाँ बटैलै ।
नेपाल सरकारके निति अनुरुप पुनर्वास नगरपालिकाके प्रत्येक वडामे स्वास्थ्य संस्था स्थापना करके संचालनमे नानल जानकारी पुनर्वास नगरपालिका वार्ड नं. ९ के अध्यक्ष नारायण प्रसाद जोशी करैलै । उहाँ समस्या केल औल्यइनासे नगरपालिकासे करल मजा काममे समेत ध्यान डेना मानवअधिकार समुहहे आग्रह करलै ।
नगरपालिकासे सुआहारा लगायत टमान गैरसरकारी संस्थासंगके साझेदारीमे सुनौला हजार दिनके बालबालिका तथा डाईके लाग टमान पोषण सम्बन्धी कार्यक्रम संचालन करटी रहलेसेफे बालबालिकाके कुपोषणके अवस्थामे सुधार आई नइसेकलमे सरोकारवालाके ध्यान जैना आवश्यक रहल बाट सामाजिक विकास शाखाके प्रतिनीधि कृष्णबहादुर तामाङ बटैलै ।
रैकवार खबरके धनबहादुर विश्वकर्मा मुक्त हलिया वस्तीके लाग कहटी राष्ट्रिय आवास कम्पनीमे निर्माण करल २५ ठो घरमे मुक्त हलिया बसोवास नइकरेबेर निर्माण करल घर जिर्ण हुइटी गैल उल्लेख करटी, मुक्तहलियाहुकनके तथ्याङक संकलनमे व्याप्त गल्ती हुइल ओरसे वास्तविक तथ्याङकसे छुटल ओ गैर हलिया समावेश हुइल ओरसे मुक्तहलियाके तथ्याङकहे पुनराबलोकन कैना आवश्यक रहल बटैलै । उहाँ सरकारी सेवासे अबकाश प्राप्त कर्मचारी तथा तीन–तीन बिगाह जग्गाके मालिकफे मुक्त हलियाके तथ्याङकमे समावेश हुके नेपाल सरकारसे दश धुर जमीनमे बनाइ डेहल घर खाली रहल तर्क डेलै ।
पुनर्वास नगरपालिकामे यी वर्ष मलखाद वितरण करेक लाग नगरक्षेत्रमे क्रियासिल ११ ठो सहकारी छनौट हुसेकल ओ प्रदेश सरकारसे पुनर्वास नगरपालिकाके मलखादके कोटा साल्टे«डिङ्ग कार्यालय धनगढीसे छुट्यइना निर्यण समेत करसेकल ओरसे पुनर्वास क्षेत्रके किसान यी वर्षसे समयमे आवश्यक मात्रामे सुलवदरमे मलखाद पैना पुनर्वास नगरपालिकाके कृषि शाखा प्रमुख ललिता चौधरी विश्वास व्यक्त करलै ।
