अपराध न्यूनीकरणमे प्रहरीके भूमिका महत्वपूर्णः मुख्यमन्त्री भट्ट
पहुरा समाचारदाता
धनगढी, २० कुँवार । सुदूरपश्चिम प्रदेशके मुख्यमन्त्री त्रिलोचन भट्ट समाजमे हुइना अपराध न्यूनिकरणमे प्रहरीके भूमिका महत्वपूर्ण रहल बटैले बाटै ।
६६ औँ प्रहरी दिवसके अवसरमे प्रदेश प्रहरी कार्यालय धनगढीमे आयोजित कार्यक्रममे बोल्टी उहाँ प्रहरी अकली समाजमे हुइना सक्कु खाले अपराध न्यूनिकरण कैना कठिनाई हुइना हुइल ओरसे आमनागरिकके भूमिका फेन सकारात्मक हुइ पर्ना बटैलै ।
टमान कठिनाईके बाबजुद फेन प्रहरी नागरिकहे सुरक्षा प्रदान करटी रहल उहाँ बटैलै । उहाँ देशके अन्य ठाउँमे घटल घट्नासे भन्दा सुदूरपश्चिममे छोटमोट घट्ना हुइले फेन ढिउर चर्चा पैना करल टिप्पणी करलै ।
उहाँ प्रहरीहे उच्च मनोबलके साथ काम कैना आग्रह कैटी अपराध अनुसन्धानमे हुइना ढिलाइसे अपराधिके मनोबल बह्रटी जाके समाजमे शान्ती सुरक्षाके अवस्था खलबलैना अवस्थासे सतर्क रहे पर्ना बटैलै ।
मुख्यमनत्री भट्ट नागरिक ओ प्रहरीबीच सुमधुर सम्बन्ध कायम कैके आघे बह्रना जरुरी रहल बटैलै ।
कार्यक्रममे सुदूरपश्चिम प्रदेशके आन्तरिक मामिला तथा कानुन मन्त्री पूर्णा जोशी निर्मला पन्त ओ अस्मिता धामी न्याय पाइ पर्ना बटैले बाटी । मन्त्री जोशी बलात्कारपाछे हत्या करल कञ्चनपुरके निर्मला पन्त ओ डडेल्धुराके अस्मिता धामी न्याय पाइ पर्ना बटाइल हुइटी ।
उहाँ कहली, ‘कञ्चनपुरके निर्मला सवा २ बरस ओ डडेल्धुराके अस्मिता मृत्यु प्रकरणके लगभग ६ महिना पुग्लेसे फेन आभिन अनुसन्धानके नतिजा अइना बाँकी रहल बा । अपराध अनुसन्धानमे हुइना ढिलाइसे समाजमे थप अपराधके घटना बह्रना ओ अपराधिके मनोबल बह्रटी जैना कहटी उ कार्यमे प्रहरीहे हाली सफलता मिले ’।
कार्यक्रममे कर्तब्य पालनाके सिलसिलामे प्राण आहुती करुइया अमर प्रहरी प्रति श्रद्धाञ्जली अर्पण कैटी सहादत प्राप्त करुइया प्रहरी परिवार ओ प्रहरी संगठनहे सहयोग पुगुइया टमान व्यक्ति तथा संघसंस्थाहे सम्मान करल रहे ।
