बाढ प्रभावितहुकन खाद्य राहत सामाग्री वितरण

पहुरा समाचारदाता
धनगढी, ५ कार्तिक । नबिल बैंक लिमिटेडसे बाढ प्रभावित क्षेत्र टीकापुर नगरपालिका, वार्ड नं ८, बटनपुरमे करिब एक हजार परिवारके लाग खाद्य राहत सामाग्री वितरण करले बा ।

बैंकसे राहत स्वरुप आठ हजार ४० पाकेट वाइ वाइ चाउचाउ, दुई हजार एक सय पाकेट रियो जुुस, दुई हजार बोटल पानी ओ एक हजार केजी चिउरा उपलब्ध कराइल हो ।

नबिल बैंक लिमिटेड टीकापुर शाखाके प्रबन्धक तेज भट्ट टीकापुर नगरपालिका वार्ड नं. ८ के अध्यक्ष दिर्घ ठकुल्लाके रोहबरमे राहत सामाग्री उपलब्ध कराइल हुइट ।

यिहे कुवाँर ३१ से कार्तिक ३ गतेसम हुइल अविरल वर्षाके कारण कर्णाली लडियामे आइल बाढसे टीकापुर क्षेत्र डुबान हुके प्राकृतिक विपतके घडीमे तत्काल राहत उपलब्ध करैना आवश्यक रहल ओरसे टीकापुर नगरपालिकाके विपद व्यवस्थापन समिति ओ चौधरी फाउण्डेसनके सहकार्यमे बैंकसे सामाजिक उत्तरदायित्व निर्वाह करटी यथाशिघ्र सहयोग उपलब्ध कराइल हो ।