बाढके कारण हुइल क्षतिके तथ्यांक संकलन सुरु

पहुरा समाचारदाता
धनगढी, ५ कार्तिक । धनगढी उपमहानगरपलिकासे बाढके कारण हुइल क्षतिके तथ्यांक संकलन शुरु करले बा । उपमहानगरपालिकासे शुकसे १९ वडामे बाढके कारण हुइल क्षतिके विवरण संकलन कार्य सुरु करल हो ।

उपमहानगरपलिका भिट्टरके सक्कु वडामे कत्राके अन्नवली ओ पशुचौपायाँके क्षति हुइल हो कहिके एकीन कैना तथ्यांक संकलन करे लागल धनगढी उपमहानगरपलिकाके मेयर नृपबहादुर बड बटैलै ।

तथ्यांक संकलन कैनासे आघे मेयर वड धनगढीके टमान वडा कार्यलयमे पुगके निश्पक्ष तरिकासे तथ्यांक संकलन कैना वडा कार्यलयहे निर्देशन डेहल रहिट । तथ्यांक संकलनपाछे पीडित किसानहुक्रनहे उचित राहतके व्यवस्था कैना प्रदेश ओ संघीय सरकारहे अनुरोध कैना बटैटी मेयर वड स्थानीय सरकार फेन राहतके व्यवस्था कैना बटैलै ।

इहे कुँवार ३१ गतेसे परल बेमौसमी बर्षातके कारण धनगढी उपमहानगरपालिकाके फूलवारी, उर्मा, जुगेडा, श्रीलंका लगायतके स्थानमे बाढके कारण ढिउर मात्रामे धानबाली लगायतके अन्नबालीमे क्षति पुगैले बा ।