बाढ प्रभावित घरधुरीहे खाद्य राहत सामग्री उपलब्ध
पहुरा समाचारदाता
कञ्चनपुर, ६ कार्तिक । चौधरी ग्रुप अन्तरगतके सामाजिक संस्था चौधरी फाउण्डेशनसे दोधारा चाँदनी नगरपालिका, कञ्चनपुरके तीन सय बाढ प्रभावित घरधुरीके लाग खाद्य राहत सामग्री उपलब्ध करैले बा ।
फाउण्डेशनके ओरसे सीजी फुडके विक्रि प्रबन्धक सुनिल कुमार सुवेदी, सीजी ब्रुअरीके विक्रि प्रबन्धक मनोज घिमिरे ओ सीजी स्न्याक्सके सहायक विक्री प्रबन्धक एकेन्द्र साउँद राहत सामग्री नगरपालिकाके मेयर विरबहादुर सुनार ओ उपमेयर चीनी ओझाहे हस्तान्तरण करल हो ।
फाउण्डेशनसे राहत सामग्री छ सय पाकेट सात सय ५० ग्रामके वाइवाइ चिकेन भुजिया चाउचाउ, एक हजार आठ सय पाकेट मीमी वाइवाइ चाउचाउ, तथा छ सय थान रियो जुस उपलब्ध कराइल हो ।
भर्खर आइल अविरल वर्षाके कारण महाकाली लडियामे आइल उच्च बाढसे दोधारा चाँदनी क्षेत्रमे डुबान हुके विपतके अवस्थामे तत्काल राहत उपलब्ध कराइल बाट चौधरी ग्रुपके प्रदेश प्रशासक बन्सी चौधरी बटैलै ।
