मोटरसाईकल अनियन्त्रित हुके एकके मृत्यु

पहुरा समाचारदाता
धनगढी,१४ कार्तिक । मोटरसाइकल अनियन्त्रित हुके एक जानेक मृत्यु हुइल बा कलेसे दुई जाने घाहिल हुइल बटै । शनिच्चरके रात १० बजेक समयमे कैलाली धनगढी उप–महानगरपालिका ३ स्थित वडा कार्यालय लग्गे पानी टं्याकीसे भन्सार ओर जैटी रहल म २ प ७६३० नम्बरके मोटरसाईकल अनियन्त्रित हुके चालक बर्ष १८ के पुष्प गिरीके मृत्यू हुइल प्रहरी जनैले बा ।

दुर्घटनापाछे घाहिल हुइल चालक गिरीके निसर्ग अस्पताल धनगढीमे उपचारके क्रममे रातके पौने एक मृत्यु हुइल रहे । ओस्टेक मोटरसाईकल पाछे बैठल उहे ठाउँक बर्ष १८ के पशुपति बोहरा ओ बर्ष १६ के समिर बोहरा घाहिल हुइल बटै । ओइनके माया मेट्रो अस्पताल धनगढीमे उपचार हुइटी रहल बा ।