अवैद्ध नगदसहित तीन जाने पक्राउ

पहुरा समाचारदाता
धनगढी, १५ कार्तिक । सुदूरपश्चिम प्रदेश प्रहरी कार्यालय दिपायल ओ जिल्ला प्रहरी कार्यालय कैलालीसे खटल टोली स्रोत नैखुलल अवैद्ध नगदसहित तीन जहनहे नियन्त्रणमे लेले बा ।

उहाँ हुकनहे गोप्य सूचनाके आधारमे धनगढीस्थित होटल अमन प्लाजामे रहल बझाङ मष्टा गाउँपालिका वडा नम्बर १ कोटदेवलके २२ वर्षीय मुकेश खड्का, १८ वर्षीय किरण खड्का ओ २४ वर्षीय नारायण खड्काहे जाँच करेबेर स्रोत नैखुलल अवैध नेपाली आठ लाख उन्नानसत्तरी हजार ओ भारतीय तीन हजार दुई सयसहित नियन्त्रणमे लेहल रहे ।

ओस्टेक उहाँहुकन ठनसे सोन जैसिन धातुके टमान गरगहना ३४.३६० ग्राम ओ चाँदी जैसिन धातुके टमान गहना ओ समान ७३७.८७ ग्राम बरामद करल बा । उहाँहुकनहे अँट्वार आवश्यक कारवाहीके लाग राजश्व अनुसन्धान कार्यालय कोहलपुर बाँके पठाइल बा ।