कृषकहे अनुदानमे गोहुँके विया वितरण
गीता चौधरी
टीकापुर, १ अगहन । जानकी गाउँपालिकासे कृषकहे अनुदानमे गोहुँके विया वितरण करले बा ।
गाउँपालिकाके गोहुँके खेती कैना कृषकहे जग्गाके क्षेत्रफलके आधारमे ५० प्रतिशत ओ ७५ प्रतिशतमे अनुदानमे उन्नत जातके गोहुँके विया वितरण करल बा । गाउँपालिकासे कृषकके उत्पादन बढाइक लाग गोहुँके गुणस्तरीय विया वितरण करटी रहल जनाइल बा ।
गाउँपालिकासे १० कठ्ठासे ढेर खेती कैना कृषकहे ५० प्रतिशत अनुदान ओ १० कठ्ठा सम खेती कैना कृषकहे ७५ प्रतिशत अनुदानमे गोहुँके विउ वितरण करटी रहल जानकी गाउँपालिके कृषी शाखा प्रमुख लालविर चौधरी जानकारी डेलै । ‘हम्रे जटराफे आवेदन डेहल कृषक बटै क्षेत्रफलके आधारमे १० कठ्ठासे उप्परके क्षेत्रफलमे खेती कैना कृषकहे ५० प्रतिशत ओ १० कठ्ठा सम खेती कैना कृषकहे ७५ प्रतिशत अनुदानमे गोहुँके विउ वितरण करटी बटी, उहाँ कहलै ।
‘गाउँपालिका भिटरके ७५ प्रतिशत अनुदानमे १ सय ८३ कृषक ओ ५० प्रतिशत अनुदानमे १ सय ५३ जाने कृषकहे गोहुँके विया वितरण करटी बटी, अब्बे कृषकहे उन्नत जातके गोहुँके विया विजय, एलएल, बाणगंंगा लगायतके विउ वितरण करटी रहल उहाँ बटैलै ।
गाउँपालिकासे अविरल वर्षाके कारण धानबालीमे क्षति हुइल कृषकके लागफे अनुदान डेना योजना बनैटी रहल बा । अनुदानमे उन्नत जातके गोहुँके विउ पाइलपाछे कृषकफे खुशी हुइल बटै । जानकी गाउँपालिका वडा नं २ के गजेन्द्रबहादुर चौधरी ३ विघामे गोहुँ खेती करटी रहल बटै । उहाँ गाउँपालिकासे उन्नत जातके गोहुँके विउ पाइलपाछे खुशि लागल बटैलै । ‘हम्रे गाउँपालिकासे गोहुँके विउ पाके खुशी बटी, यहाँसे गोहुँके विया पाके समयके बचत हुइल बा । पैसा कम परल बा,उन्नत जातके विया पैले बटी उहाँ कहलै ।
जानकी गाउँपालिका वडा नं ५ के विन्दू भण्डारीफे गाउँपालिकासे अनुदानमे गोहुँके विउ पाइलपाछे खुशी बटै । ‘हम्रे बाहेरसे गोहुँके विया नानेबेर समस्या हुए, गाउँपालिकासे पैली मजा हुइल खुशी बटु’ उहाँ कहलै । गाउँपालिकासे गोहुँके विया केल नइहुके मलमे सहयोग करेबेर आउर कृषकहे राहत हुइना उहाँ बटैलै ।
