रावल पक्षसे समानान्तर प्रतिनिधि छनौट, सुदूरपश्चिममे १६४ प्रतिनिधि छन्लै

पहुरा समाचारदाता
धनगढी,१ अगहन । नेकपा एमालेके १० औँ राष्ट्रिय महाधिवेशन प्रतिनिधिके लाग सुदूरपश्चिम प्रदेशसे १६४ जाने छनौट हुइल बटै ।

बुधके नेकपा एमाले पार्टी कार्यालय कैलालीमे पत्रकार सम्मेलन करटी उ जानकारी डेहल हो । उहोर भीम रावल पक्षसे भर मंगर हुइल प्रतिनिधि छनौट अमान्य हुइल कहटी बुधके रोज कैलालीमे भीम रावल निकटके झपट रावलके निर्वाचन क्षेत्र रहल क्षेत्र नम्बर २ मे रावल निकटहुक्रे समानान्तर महाधिवेसन प्रतिनिधी छनौट कैगिल बा ।

बुधके बोलाइल भेलासे सर्वसम्मत रुपमे प्रतिनिधि छनौट करल पार्टीके प्रदेश कमिटी सदस्य तथा महाधिवेसनके प्रत्यासी महादेव बजगाई जानकारी डेलै । अगहन १०–१२ गतेसम चितवनमे हुई जैटी दशौं राष्ट्रिय महाधिवेशनमे कैलाली क्षेत्र नं.२ से ६ पुरूष ओ ३ महिला करके जम्मा ९ जाने प्रतिनिधि छनौट करल बजगाई बटैलै ।

पार्टी एमाले नइहुके कैलालीमे रतन थापासे कम्पनी चलाइल हस कहटी उहाँ आपत्ती जनैलै । उहाँ कहलै ‘पार्टीके पद्धती अनुसार नइचलके एकलौटी ढंगसे होटेलके कोठामे बैठके महाधिवेशन प्रतिनिधि छानल बटै । हम्रहिनहे उ मान्य नइहुई पार्टीके सक्कु संगठित सदस्यहुकनके बैठक बैठाके हम्रे महादिवेशन प्रतिनिधी छन्ले बटी ।’

लम्की–चुहा–९ से यज्ञराज ढुङाना, ८ से मनोज खड्का, १ से सूर्यबहादुर थापा, मोहन्याल गाउँपालिका–७ से वीरेन्द्रबहादुर रावल, बर्दगोरिया गाउँपालिका–१ से भीम कुँवर ओ जानकी गाउँपालिका–९ से रुप रावत महाधिवेशन प्रतिनिधिमे चयन हुइल बटै ।

ओस्टेक करके, महिलाओर लम्की–चुहा नगरपालिका–१ से बसुन्धरा भण्डारी, ५ से ममता रावल ओ जानकी गाउँपालिका–८ से गंगा थापाहे महाधिवेशन प्रतिनिधि चयन करल बा ।

महाधिवेशनके लाग प्रतिनिधि छनौटमे असन्तुष्टि जनैटी दुसर पक्षसे भेला बोलाइलपाछे एमाले कैलालीके अध्यक्ष रतन थापासे कारबाहीके चेतावनी डेले बटै । उहाँ पार्टी विरोधी गतिविधिमे संलग्न हुइलहे कारबाही कैना चेतावनी डेहल हुइट ।

पार्टीके नाम प्रयोग करके कौनो पार्टी विरोधी गतिविधि करलेसे कारबाही कैना उहाँ बटैले बटै । उहे निर्वाचन क्षेत्रसे जिल्ला अध्यक्ष रतन थापा पक्षसे यी आघे महाधिवेशन प्रतिनिधि चयन करके केन्द्रहे पठासेकल बटै ।

ओस्टेक बुधके नेकपा एमाले पार्टी कार्यालय कैलालीमे पत्रकार सम्मेलन करटी महाधिवेशन प्रतिनिधिमे दार्चुलासे १२, बझाङसे १६, बैतडीसे १४, डडेल्धुरासे ११ जाने छनौट हुइल नेकपा एमाले सुदूरपश्चिम प्रदेश कमिटीके अध्यक्ष कर्ण थापा जानकारी डेलै । ओस्टेक बाजुरा २१, कञ्चनपुर १६, डोटी १६, कैलाली ४४ ओ अछामसे १४ जाने छनौट हुइल उहाँ बटैलै ।

कञ्चनपुरके क्षेत्र नं १ से ३ जाने खुल्लासे ओ महिला १ करके ४ जाने बटै कलेसे क्षेत्र नं २ मे खुल्ला ४ ओ २ महिला करके ६ जाने छनौट करल बा । क्षेत्र नं ३ मे खुल्ला ३, महिला १, दलित २ करके ६ जाने रहल बटै । और ठाउँमे सर्वसम्मत हुइलेसेफे कञ्चनपुरके क्षेत्र नं १ ओ कैलालीके क्षेत्र नं ४ मे भर मतदान प्रक्रियासे प्रतिनिधि छनौट करल नेकपा एमाले सुदूरपश्चिम प्रदेश कमिटीसे जानकारी डेहल ।

कैलालीके निर्वाचन क्षेत्र नं १ से कमला शाही, सोमवहादुर थापा, तपेन्द्र रावल, श्याम खत्री, द्वारिका न्यौपाने महाधिवेशन प्रतिनिधिमे छनौट हुइल बटै । निर्वाचन क्षेत्र नं २ से रतन थापा, डेजी पाण्डे, दलबहादुर विष्ट, नरबहादुर खड्का, कमला ओली, टीका थापा, पदमपुरा साउद, गजेन्द्र स्वाँर धरम बहादुर थापामगरहे छनौट करले बा । निर्वाचन क्षेत्र नं ३ से रतन रेग्मी, छाँया देवकोटा, नरेन्द्र बटाला, विष्णु चौधरी, नवराज शाही बटै ।

उहोर चुनावी प्रक्रियासे निर्वाचन क्षेत्र नम्बर ४ मे निर्मला भट्ट, भागरथी विष्ट, हरि सिंह साउद, पदम सिह सिंगाल, रामप्रसाद चौधरी, किसन साउद ओ धनबहादुर रोकामगर छनौट हुइल बटै । ओस्टेक निर्वाचन क्षेत्र नं ५ से जीवन कुमार बम, राजेश खाती, रणबहादुर चन्द, डिल्लीराज खड्का, झुमादेवी चौधरी, नेपालु चौधरी, सन्तोष शर्मा थापा, धर्मराज पाठक, दुर्गा जोशी, रुक्मिणी देवकोटा रहल बटै ।

दलितओरसे भर दानबहादुर विश्वकर्मा, विजयराज सिंह नेपाल, ललित परियार, मोतिसिंह विश्वकर्मा, चन्द्रबहादुर दमाई, सत्यराज स्नेही, हीरा विक, सरिता सिजापतिहे प्रतिनिधिमे छनौट करल नेकपा एमाले कैलालीके उपसचिव नेपालु चौधरी जानकारी डेैलै ।