नेकपा एकीकृत समाजवादीमे सुदूरपश्चिमसे ७ केन्द्रीय सदस्य
पहुरा समाचारदाता
धनगढी, २ अगहन । नेकपा एकीकृत समाजवादीके केन्द्रीय सदस्यमे सुदूरपश्चिम प्रदेशसे ७ जानेक प्रतिनिधित्व हुइल बा ।
उ पार्टीके केन्द्रीय सदस्यमे सुदूरपश्चिमसे प्रतिनिधित्व कैनामे प्रेम आले, निरादेवी जैरु, मदनकुमारी शाह गरिमा, माया भट्ट, पूर्णा जोशी, भानुभक्त जैशी ओ उर्वादत्त पन्त बटै ।
नेकपा एमालेसे संघीय संसदमे प्रतिनिधित्व करल ढेर जैसिन सांसद तत्काल नेकपा एकीकृत समाजवादीमे नइजैना हुइल बटै । विगतमे माधव समूहमे रहल नेकपा एमाले उपाध्यक्ष भीम रावलसहित दीपकप्रसाद भट्ट, लक्ष्मीकुमारी चौधरी, झपट रावल, बिना बुढाथोकी लगायतसे तत्काल नयाँ पार्टीमे नइजैना संकेत करले बटै ।
सुदूरपश्चिमसे प्रतिनिधिसभामे एमालेके १६ जाने सांसद बटै । नेकपा एकीकृत समाजवादीमे सुदूरपश्चिमसे प्रतिनिधित्व कैना ७ जाने केन्द्रीय सदस्यमन्से प्रेम आले ओ निरादेवी जैरु प्रतिनिधिसभा सदस्य हुइट कलेसे मदन कुमारी शाह गरिमा संविधानसभा सदस्य हुइट । माया भट्ट ओ पूर्णा जोशी प्रदेशसभा सदस्य हुइना कलेसे भानुभक्त जैशी पूर्वमन्त्री ओ उर्वादत्त पन्त पूर्व सांसद हुइट ।
