काँग्रेस कैलालीके सभापतिमे ६ जानेक दाबी
पहुरा समाचारदाता
धनगढी, ९ अगहन । काल्ह (अगहन १० गते) हुइना चुनाव हुइनामे काँग्रेस कैलालीके सभापतिमे ६ जानेक दाबी रहल बा ।
सभापतिके लाग धनगढी उपमहानगरपालिकाके मेयर नृपवहादुर वड, जिल्ला उपसभापति प्रकाश वहादुर वम, पूर्व उपसभापति नारायण भट्ट, खेमराज चौधरी, गणेश देउवा ओ युवानेता भीम वडुवालके दाबी रहल बा । उहाँहुक्रे सक्कु जे महाधिवेशन प्रतिनिधिमे निर्वाचित हुइल बटै ।
वड, भट्ट ओ देउवा कैलाली क्षेत्र नम्बर ५ से निर्वाचित हुइल बटै । ओस्टेक खेम चौधरी ओ वडुवाल क्षेत्र नम्बर ३ से विजयी हुइलै कलेसे उपसभापति प्रकाशवहादुर वम क्षेत्र नम्बर ४ से विजयी हुूइलै ।
वर्तमान जिल्ला सभापति नरनारायण शाहके पहिल रोजाइमे खेमराज चौधरी ओकरपाछे नृप वड ओ प्रकाश वम रहल चर्चाफे बा ।
नेपाली काँग्रेस कैलाली यिहे अगहन १० गते हुूइना जिल्ला अधिवेशनके लाग नामांकन कार्यक्रम (उम्मेदवारी दर्ता) अगहन १० धनगढी स्थित बिपि स्मृति भवन (पार्टी कार्यालय) तोकल जिल्ला निर्वाचन अधिकृत टेक प्रसाद सुवेदी जनैलै । उहाँ कहलै, उम्मेदवारी दर्ता अगहन १० हुई समय रहलेसे शुकके रोज निर्वाचनफे हुई ।
