सार्वजनिक सुरक्षा विषयमे छलफल
पहुरा समाचारदाता
धनगढी, ९ अगहन । धनगढीस्थित धनगढी इन्जिनियरिड्ड कलेज (नाष्टे)मे विफेक रोज यहाँ अध्ययनरत विद्यार्थीहुकनसँग सार्वजनिक महत्वके विषयमे कार्यशाला गोष्ठी कार्यक्रम हुइल बा ।
काठमाडौंसे आइल विज्ञहुक्रे इन्जिनियर बदनलाल न्हुच्छे ओ इन्जिनियर अनन्तराम वैध सबके लाग सार्वजनिक सुरक्षा तथा व्यापार ओ पेशामे नैतिकता ओ निष्ठा विषयमे छलफल कैले रहिट ।
कार्यक्रममे इन्जिनियर न्हुच्छे हरेक काममे गल्ती हुइठ । मने, जे गल्तीहे सुधार करि ओहे प्रगतिके डगरमे जाइ कटि, गल्ती सुधारके लाग नैतिक रुपमे अग्रसर हुइपरना उहाँक कहाइ रहे । उहाँ चहा जौन विधामे फेन नैतिकता आवश्यक रहल बटैलैं । उहाँ सरकारी क्षेत्र, गैरसरकारी क्षेत्र, सञ्चारमाध्यम, पर्यटन, व्यापार, व्यवसाय, योजना व्यवस्थापनलगायतके क्षेत्रमे नौतिकता कैसिक आवश्यक बा कनाबारेमे जानकारी करैले रहैं ।
ओस्टेक, कार्यक्रममे इन्जिनियर वैध सार्वजनिक सुरक्षा कायम करेक लाग सरोकारवालाहुकनके सँगे आम जनसाधारणके फेन दायित्व रहल बटैलैं । उहाँ प्राकृतिक प्रकोपहे न्यूनीकरणके लाग सरोकारवाला निकाय सामान्य नियमहे लागू कैलेसे जोखिम घटना बटैलैं । उहाँ अग्नी जोखिम ओ यकर अल्पीकरण, भूकम्प, बाढपहिरो, महामारीके जोखिम ओ समाधानके विषयमे छलफल कैले रहिट ।
कार्यक्रममे नाष्ट कलेजके प्राध्यापक शिवहरि मुडभरी कानूनके सहि कार्यान्वयन हुइलेसे सक्कु सार्वजनिक सुरक्षा कायम हुइना बटैलैं । उहाँ गम्भीरता पूर्वक अध्ययन कैके सुरक्षाके बारेमे इन्जिनियरलगायत सरोकारवाल निकाय कौनो सम्झौता नैकरे परना बटैलैं ।
कार्यक्रम नाष्ट कलेजके प्राचार्य डा. प्रेमबहादुर चन्दके अध्यक्षतामे हुइल रहे । कार्यक्रममे कलेजके टमान संकायके विद्यार्थीहुकनके सहभागिता रहल रहे ।
