बालबालिका अनलाइन यौन दुर्व्यवहारमे फस्टी
पहुरा समाचारदाता
धनगढी, ९ अगहन । बालबालिकाहुकनहे अनलाइन यौन दुर्व्यवहारसे सुरक्षित रख्न नीति निर्माण करे पर्ना सरोकारवालाहुक्रे बटैले बटै ।
बिफेक रोज धनगढीमे समाज सेवा ओ मानव अधिकारमे महिला सशक्तीकरण संस्थासे आयोजना करल अन्तरक्रिया कार्यक्रमके सहभागीहुक्रे बालबालिकाहुक्रे अनलाइन यौन दुर्व्यवहारमे फसल कहटी चिन्ता व्यक्त करल हुइट ।
पछिल्का समय महिला, बालबालिका ओ युवाहुक्रे अनलाइन यौन दुर्व्यवहार फस्टी आइल बटै । कोरोना महामारीसे विद्यालय पूर्ण रूपमे बन्द हुइलपाछे युवायुवती ओ बालबालिका झन अनलाइन यौन दुर्व्यवहारमे परल सरोकारवाला बटैठै ।
अनलाइन कक्षा पढेक लाग बालबालिकाहुकनहे अभिभावकहुक्रे मोबाइल लगायतके वस्तु खरिद करले रहिट । बालबालिकाहुक्रे अब्बे उ साधनके प्रयोगसे ढेर दुरुपयोग करटी बटै । बालबालिकाहुकनहे कैसिक अनलाइन यौन दुर्व्यवहारसे सुरक्षित धारे सेक्जाई कना सवालहे लेके सुदूरपश्चिम ओ प्रदेश नम्बर ३ मे काम करटी रहल समाज सेवा ओ मानव अधिकारमा महिला सशक्तीकरण संस्थाके अध्यक्ष भावना ऐर जानकारी डेली । कोभिड–१९ पाछे यी असर बालबालिकामे ढेर परल ओ परे सेक्ना ओरसे सक्कु जे सचेत रहे पर्ना उहाँ बटैली ।
प्रदेश सरकारसे नीतिगत रूपमे लागु करे पर्ना बाटमे उहाँ जोड डेली । पछिल्का समय बालबालिका मोबाइलमे समय व्यतित करटी आइल कञ्चनपुरके पुर्नवास नगरपालिकाके मेयर जीवनराज थापा बटैलै । मोबाइल हातमे नइरहल बालबालिका खाना समेत नइखैना करल उहाँक कहाई बा । अनलाइन माध्यम प्रयोग करेबेर कुछ मजा पक्ष हुइलेसेफे कतिपयसे अनलाइनके दुरुपयोग करटी रहल उहाँ बटैलै ।
बालबालिकाहुक्रे सामाजिक सञ्जाल समेत प्रयोग कैना हुइल कारण उहाँ अनेक सामग्री हेर्ना ओ शेयर समेत कैना करल बटै । साथे गुगल वा और माध्यमसे अश्लील भिडिओ हेर्ना ओ संघरीयाहे पठैना लगायतके काममे समेत बालबालिका सक्रिय डेखल बटै ।
नेट इन्टरनेटसे ढेर बाट सिखैलेसेफे सही तरिकासे प्रयोग करे नइसेक्के विकृति बढल प्रदेश सरकारके सामाजिक विकास राज्यमन्त्री मना कुमारी साउँद बटैली । बालिका बलात्कार, बेचबिखन, बालविवाह ओ हिंसाके घटना बढ्नके मुख्य कारण अनलाइन समेत रहल उहाँ बटैली ।
इन्टरनेटके कारण बालबालिका ढेर अनलाइन खेलकुदमे ढेर समय खर्च करटी रहल बटै । जेकर कारण पढाइमे समेत ओइनके ध्यान जाई नइसेकल अवस्था बा । सक्कु शक्तिके परिचालन हुइलसेसेफे सुदूरपश्चिमके घटना नियन्त्रण करे नइसेकल राज्य मन्त्री साउँदके कहाई बा ।
कोरोना संक्रमणके अवधिमे बालबालिकाहुक्रे विद्यालय जाई नइपाके अनलाइनमे व्यस्त रहिट । जेकर कारण अब्बे ओइनमे अनलाइनके लत बैठसेकल बा । लागुऔषध सेवन कर्ताहे पक्रना हो कलेसे जेलमे रख्ना समेत ठाउँ नइपुग्न अवस्था बा ।
सुदूरपश्चिम प्रदेशके सामाजिक विकास मन्त्री लाल बहादुर खड्काके अनुसार प्रदेश सरकारसे बालबालिका सम्बन्धी ऐन समेत निर्माण करले बा । बालबालिकाहुक्रनहे अनलाइन यौन दुब्र्यबहारसे सुरक्षित रख्न सेक्ना सहयोग कैना प्रतिवद्धता जनैलै ।
अनलाइनसे बालबालिकामे नइमजा प्रभाव परल आर्थिक मामिला तथा योजना मन्त्री तारा लामा तामाङ बटैलै । अनलाइनसे हुइना टमान मेरिक दुव्र्यवहारहे कम कैना एप्स निर्माण कैना आवश्यक बा । अभिभावकफे यी सवालमे सचेत हुई पर्ना उहाँ बटेलै ।
यी समस्याहे समाधान कैना टमान कार्यक्रम बनाके कार्यान्वयन कैना प्रदेश प्रमुख देवराज जोशी अनुरोध करले बटै । समयमे यी सवालमे आवश्यक कानुन ओ कार्यक्रम बनाके तीनु सरकारसे कार्यान्वयन कैना उहाँ निर्देशन डेलै ।
