काँग्रेस कञ्चनपुर सभापतिमे बोगटी निर्वाचित
पहुरा समाचारदाता
कञ्चनपुर, १२ अगहन । नेपाली काँग्रेस कञ्चनपुरके जिल्ला सभापतिमे नेता रमेश लेखक निकट पदम बोगटी निर्वाचित हुइल बटैं ।
अँट्वार निम्जल मतगणना अनुसार उहाँ ८०६ मत प्राप्त करल बटैं । उहाँक निकटतम प्रतिद्वन्द्वी पूर्वमन्त्री एनपी साउँद निकट बहादुर सिंह थापा ७१५ मत प्राप्त करले बटैं ।
उपसभापतिमे साउँद प्यानलके दुनु उम्मेदवार विजयी हुइल बटैं । साउँद प्यानलके मीनबहादुर सिंह ७८६ ओ हरिशचन्द्र राना ७६३ मत सहित विजयी हुइल बटैं । उहाँहुकनके निकटतम प्रतिद्वन्द्वी लेखक प्यानलका शंकर चन्द ७४० ओ दिवाकर पाण्डेय ७०४ मत प्राप्त करलैं ।
सचिवमे फेन साउँद निकट उम्मेदवार विजयी हुइल बटैं । सचिवमे हेमराज ओझा ओ भीमराज भट्ट क्रमशः ७३० ओ ७२९ मत नान्के विजयी हुइलैं । उहाँक निकटतम प्रतिद्वन्द्वी लेखक प्यानलके सिद्धराज भट्ट ओ जनकसिंह धामी क्रमशः ७१३ ओ ६८० मत प्राप्त कैलैं ।
ओस्टेक, दुनु प्यानलमे नैलागल सचिव पदके उम्मेदवार तर्कराज भट्ट १३० मन पैलैं । सहसचिवमे लेखक ओ साउँद प्यानलके एक/एक जाने विजयी हुइल बटैं । साउँद प्यानलके सहसचिवके उम्मेदवार नाफुसिंह साउँद ओ लेखक प्यानलके पुष्कल चौधरी ६७४ मत नान्के विजयी हुइलैं ।
लेखक प्यानलके सहसचिव पदके औरे उम्मेदवार कविराज भट्ट ६४९ ओ साउँद प्यानलके हरिप्रसाद अधिकारी ६१७ मत पैलैं । सहसचिवके स्वतन्त्र उम्मेदवार कलकबहादुर सिंह २९७ मत प्राप्त कैलैं ।
