बडुवालके हत्याराहे कारबाहीके माग करटी धनगढीमे प्रदर्शन
पहुरा समाचारदाता
धनगढी, २१ अगहन । कैलालीके लम्कीके भूपेन्द्र बडुवालके हत्याराहे पक्राउ करके कारबाही कर कहटी धनगढीमे प्रदर्शन करल बा ।
मंगरके बडुवालके आफन्तहुक्रे हत्याराहे पक्राउ करके कारबाही कैना माग करटी प्रदर्शन करल हुइट । ओइने ‘हत्याराहुकनहे कारबाही कर, हत्याराहुकनहे धरौटीमे रिहा करे नइमिली’ सक्कु हत्याराहे जन्मकैद’ लगायतके नारासहित प्रदर्शन करल हुइट ।
धनगढीके पार्कचोकसे सुरु हुइल प्रदर्शन जिल्ला प्रहरी कार्यालयसे जिल्ला अदालत कैलालीके गेटसम ओइने नारा सहित प्रदर्शन करले रहिट । प्रदर्शनमे सहभागि मृतकके काकी मन्जुदेवी बडुवाल फरार अभियुक्तहुकनहे इन्काउन्टर कैना माग करली । उहाँ परिवारसे न्याय पाई पर्ना बटैली । अदालतमे आइल मुद्धाहे वकील मिलके हत्याराहे धरौतीमे छोरलेसे कडा आन्दोलन कैना चेतावनि समेत डेली ।
ओस्टेक प्रदर्शनमे सहभागि दुसर महिला नेत्री सम्जना केसी छोट उपस्थितिमे चेतवनी केल रहल कहटी आन्दोलनके स्वरुप परिवर्तन करके सडकहे ठप तटैना बटैली । ‘नेपालमे दिनदिने न्याय मरटी गैल बा हम्रे हेरटी रहल बटी ।’ हत्याराहुकनहे जौनफे ठाउँसेफे नियन्त्रण करके कारबाहीके दायरामे नन्ना अपनेहुकनके माग रहल उहाँ बटैली । कार्तिक २३ गते मंगर रात भूपेन्द्र बडुवालके हत्या हुइल रहे ।
हत्या प्रकरणमे संलग्न, योजनाकार ओ मतियार करके २१ जाने विरुद्ध मुद्धा दायर करल जिल्ला प्रहरी कार्यालय कैलालीके प्रमुख प्रहरी उपरीक्षक विश्व अधिकारी बटैलै । सोम्मार पत्रकार सम्मेलनके आयोजना करटी बडुवाल हत्या प्रकरण हालसम १२ जनहनहे पक्राउ करल उहाँ जानकारी डेहल रहिट । उहाँक अनुसार अभिन हत्यामे संलग्न ९ जाने फरार अवस्थामे रहल बटै । ओइनके खोजी कार्य तीव्र पारल प्रहरी उपरीक्षक अधिकारीके कहाई बा ।
