हसुलियामे माविस्तरीय वक्तृत्वकला प्रतियोगिता

पहुरा समाचारदाता
हसुलिया, २३ अगहन । लैङ्गिक हिंसा विरुद्धके १६ दिने अभियान अन्र्तगत कैलालीके कैलारी गाउँपालिकामे टमान मेरिक कार्यक्रम आयोजना कैके मनाजैटी रहल बा । इहे सन्दर्भमे बुधके गाउँपालिका अन्र्तगत रहल अन्तर मावि स्तरीय वक्तृत्वकला प्रतियोगिता सम्पन्न हुइल बा ।‘घरसे शुरु करी, महिला हिंसा अन्त्य करी’ शिर्षकमे हुइल प्रतियोगितामे ८ ठो माविके १७ जाने विद्यार्थीनके सहभागिता रहल रहे ।

प्रतियोगितामे राष्ट्रिय मावि विचैपुरके एलिजा चौधरी प्रथम, कृष्ण थापा द्धितिय ओ ब्राइट स्टार इङ्गलिस स्कुलके रीता चौधरी तृतीय हुइल रहिट । उक्त प्रतियोगितामे प्रथम ,द्धितिय, तृतिय ओ सान्त्वना स्थान प्राप्त करुइया विद्यार्थीहे १० डिसेम्बर अन्तराष्ट्रिय मानव अधिकार दिवश ओ लैङ्गिक हिङ्सा विरुद्धके १६ दिने अभियानके समापन समारोहमे पुरस्कृत करजैना महिला तथा बालबालिका शाखा प्रमुख बाल कुमारी चौधरी जानकारी डेली ।

कार्यक्रममे गाउँपालिका उपाध्यक्ष लक्ष्मी सत्गौंवा थारु लैङ्गिक हिंसा न्युनीकरण कैना सक्कु जाने अपने घरसे शुरु करे पर्ना बटैली । यकर लाग विद्यार्थी मार्फत नै लैङ्गिक हिंसा न्युनीकरण सचेतना अभिवृद्धि कैना सम्भव रहल बटैटी उहाँ वक्तृत्वकला प्रतियोगितासे बालबालिकाके क्षमता विकास हुइनाके साथे महिला हिंसा ओ विभेद समेत न्युनकीरण कैना मद्दत पुग्ना बटैली । यकर साथे उहाँ उपाध्यक्ष थारु परम्परागत चालचलन रितिरिवाजके आधारमे करजैना विभेद न्युनीकरणके लाग विद्यालय स्तरीय कार्यक्रम फेन गाउँपालिकाके प्राथमिकतामे रहल बटैली ।

कार्यक्रममे शाखा प्रमुख गणेश प्रसाद मिश्र लैङ्गिक हिंसा न्युनीकरण कैना विद्यार्थी नै आपन घरपरिवार छरछिमेकमे सचेतना फैलैना सहयोग कैना बटैलै । प्रतियोगिताके निर्णायकमे सामाजिक विकास शाखा प्रमुख यगम कलेल ओ रोजगार शाखा प्रमुख निता भण्डारी रहल रहिट ।

नोभेम्बर २५ से सञ्चालन हुइल अभियान अगामी १० डिसेम्बरसम कैलारी गाउँपालिका अन्र्तगत टमान मेरिक कार्यक्रम कैके मनैटी आइल महिला तथा बालबालिका शाखा प्रमुख चौधरी जानकारी डेली ।

अभियान अन्र्तगत पारिवारिक संवाद कार्यक्रम, महिला पुरुष समविकास तालिम, सासू बुहारी अन्तरक्रिया कार्यक्रम, बालविवाह न्युनीकरण ओ लागुऔषध दुव्र्यसन न्युनीकरण सम्बन्धी अन्तरक्रिया लगायत रहल बा ।

कैलारी गाउपालिका महिला तथा बालबालिका शाखाके आयोजनामे हुइल अभियानहे सफल पारक लाग नेपाल रेडक्रस सोसाईटी एमरेड परियोजना, मर्सिकोर, ओरेक नेपाल, सामाजिक सेवा अध्ययन केन्द्र, समीक्षा महिला बहुउद्देश्यी सहकारी संस्था, पारदर्शी, चेतनशिल महिला विकास बहुउद्देश्यीय सहकारी संस्था, कालिका कृषि सहकारी संस्था, दलित महिला अधिकार मञ्च लगायत संघ संस्थाके सहकार्य रहल बा ।