उमादेवी वादीहे ‘कर्मयोगी बद्री पहाडी समाजसेवा पुरस्कार’
पहुरा समाचारदाता
टीकापुर,२३ अगहन । सुदूरपश्चिम प्रदेश माननीय उमादेवी वादी पुरस्कृत हुइल बटै ।
बिफेक रोज एक कार्यक्रम मार्फत नेपाल सरकारके रक्षा मन्त्री डाक्टर मिनेन्द्र रिजाल ‘कर्मयोगी बद्री पहाडी समाजसेवा पुरस्कार’ २०७७ से माननीय वादीहे समान्न पत्र सहित नगद पुरस्कारसे सम्मान करल हुइट । ‘कर्मयोगी बद्री पहाडी समाजसेवा पुरस्कार’ मानव अधिकार तथा शान्ति समाजसे स्थापना करल हो ।
वादी समुदायके उत्थानके लाग २०६४ सालमे ४८ दिन सम सिंहदरबार केन्द्रीत आन्दोलन करलपाछे नेपाल सरकारसंग दुई बँुदे सम्झौता हुइल हो । उहे सम्झौताके जगमे वादी समूहसे टमान अधिकार प्राप्त करल कहटी मानव अधिकार तथा शान्ति समाजसे २०७८ असार २८ गते अधिकारकर्मी वादीहे पुरस्कृत कैना निर्णय करल रहे । अन्तराष्ट्रिय मानव अधिकार दिवसके अघिल्का दिनके अवसर पारके उहाँहे सम्मान करल शान्ति समाजसे जनैले बा ।
सम्मानपाछे प्रदेश माननीय वादीसे अपनहे खुसी लागल बटैलै । ‘ मोर लाग यी ढेर सम्मान हो, बहुट खुसी लागल बा,’ उहाँ कहलै, ‘पीडा ओ आत्मसम्मानके लाग करल लडाई ढेर महिला न्याय पैले बटै कलेसे सिंगो वादी समुदायसे कुछ हुइलेसे अधिकार पाइल अवस्था बा ।’ मै सुरु करल आन्दोलनसे महिला अधिकार स्थापित हुइना सघाइल जेकर मुल्याकंन आज मानव अधिकार तथा शान्ति समाजसेफे करले बा ।’ वादी कहलै ।
अपने पाइल यी उचाईमे अधिकारकर्मी ओ सञ्चारकर्मीके भूमिका अहम रहलफे वादी बटैलै । उहाँ अपन आन्दोलनहे सघैना ओ सम्मान तथा अवसरके लाग सहयोग कैना सक्कुहुनहे धन्यावाद डेलै । ‘यैसिन सम्मान ओ अवसरसे थप संघर्ष कैना हौसला मिलल बा,’ वादी कहलै, ‘मोर संघर्षके मुल्याकंन करके हुई नेपाली कांग्रेससे समानुपातिक कोटासे प्रदेश माननीय बनाइल बा ।’ विपन्न वादी समुदायके लाग लरटी आइल वादीहे विश्व प्रसिद्ध सञ्चारमाध्यम विविसीसे सन् २०१८ के विश्वके १०० जाने उत्प्रेरणादायी ओ प्रभावकारी महिलाके सुचिमे १० नम्बरमे पारल रहे ।
२०१८ साल फागुन ४ गते जन्मल वादी अति विपन्न बर्गमे जन्मल हुइलेसे अपन समुदायके लाग कुछ करे परठ कना मानसिकता बोक्के काम करटी आइल स्थानीयके कहाई बा ।
