हात्तीके आक्रमणसे एक जानेक मृत्यु

पहुरा समाचारदाता
कञ्चनपुर, २६ अगहन । कञ्चनपुरके लालझाडी गाउँपालिका–६ ढक्का शिविरके ४५ वर्षीय खगिराज रानाके शनिच्चरके रात बनहात्तीक आक्रमणसे मृत्यु हुइल बा । झुपडी भत्काईबेर भग्ना क्रममे हात्ती आक्रमण करेबेर उहाँक मृत्यु हुइल आरक्ष संघर्ष समितिके अध्यक्ष हीरासिंह भण्डारी जानकारी डेलै ।

घाहिल अवस्थाके रानाहे स्थानीय बासिन्दाके सहयोगमे रात एम्बुलेन्समे धारके बेलौरीस्थित अस्पतालमे उपचारके लाग लैजैना क्रममे मृत्यु हुइल उहाँ बटैलै । हात्ती आइल पत्ता पैटीकी परिवारके सक्कु भग्लै, उहाँ कहलै, ‘खगिहे भग्ना क्रममे हात्ती आक्रमण करके गोर टुरल । हो–हल्ला करके हात्ती भगैली, अस्पताल पुगाईबेर ज्यान गैल ।’

शिवरमे रानाके गोसिनीया, पटुहिया ओ नातियानतिनियासंगे बैठटी आइल रहिट । हात्तीसे शिविरके बासिन्दाके २० झुपडीसमेत भत्काडेले बा । शुक्लाफाँटा राष्ट्रिय निकुञ्जसे रात ८ः३० बजे १५ ढेरके सख््यामे छावासहितके बनहात्तीके बथान शिविरमे छिरल उहाँक कहाई बा । हात्ती झुपडी भत्कैना सुरु करलपाछे शिविरके बासिन्दा सक्के एक्के ठाउँमे जम्मा हुके हो–हल्ला करलपाछे हात्ती निकुञ्जओर भागल बताइल बा ।

शिविरसहित हात्तीके बथान लालझाडी गाउँपालिकाके डुङग्रेके बासिन्दाके समेत घर भत्काडेहल वडाध्यक्ष फुलाराम चौधरी बटैलै । हात्ती बस्तीमे छिरके मानवीय क्षति करे लागलपाछे स्थानीय बासिन्दा त्रसित अवस्थामे रहल उहाँ बटैलै ।