सुदूरपश्चिममे ठप ९ जनहनमे संक्रमण पुष्टि
पहुरा समाचारदाता
धनगढी, २६ अगहन । सुदूरपश्चिम प्रदेशमे पछिल्का २४ घण्टामे ठप ९ जनहनमे कोरोना संक्रमण पुष्टि हुइल बा ।
सुदूरपश्चिम प्रदेश सामाजिक विकास मन्त्रालय स्वास्थ्य निर्देशनालयसे डेहल जानकारी अनुसार आठ सय जानेक कोरोना परिक्षणमे ९ जनहनमे संक्रमण पुष्टि हुइल हो । पछिल्का २४ घण्टामे एन्टीजेन परिक्षण केल कैगिल रहे । प्रदेशके कैलाली जिल्लाके २२ जाने, कञ्चनपुरके ११ ओ अन्य जिल्लाके ७ करके ४२ जाने पीसिआरके सक्रिय संक्रमित रहल निर्देशनालय जनैले बा । कलेसे एन्टीजेनके ३४ जाने सक्रिय संक्रमित बटै । जेम्ने कञ्चनपुरके सबसे ढेर २३ जाने रहल बटै । बैतडीके ४, बझाङके ६ ओ कैलालीके १ करके ३४ जाने रहल जनागिल बा ।
अँटवारके रोज टमान सीमा नाकासे १४ सय ९१ जाने नेपाल भिटरल निर्देशनालय जनैले बा । जेम्ने गडडा चौकीसे नाकासे ४ सय ९५ जाने, गौरीफन्टा नाकासे ९ सय ४७, झुलाघाट बैतडीसे ४९ जाने नेपाल भिटरल जनागिल बा । प्रदेशमे हालसम एन्टीजेन करल मन्से २ सय ४५ जानेक ओ आरटी पीसिआर करल मन्से ३ सय ६६ जानेक मृत्यू हुइल हुइल मन्त्रालय जनैले बा ।
ओस्टेक करके पछिल्का २४ घण्टामे देशभर थप २५४ जनहनमे कोरोना संक्रमण पुष्टि हुइल बा । ६ हजार २६८ जानेक पीसीआर परीक्षण करेबेर २४२ जाने ओ २ हजार ४ सय १४ जानेक एन्टीजेन परीक्षण करेबेर १२ जो करके २५४ जनहनमे कोरोना संक्रमण पुष्टि हुइल स्वास्थ्य तथा जनसंख्या मन्त्रालय जनैले बा ।
ओस्टेक करके पछिल्का २४ घण्टामे १ जानेक मृत्यु हुइल बा कलेसे २३४ जाने संक्रमणमुक्त हुइल बटै । अँटवार थपलसंगे नेपालमे कोरोना संक्रमितके कुल संख्या ९ लाख २० हजार ४ पुगल बा । यी संगे नेपाल मृत्यु हुइलके संख्या ११ हजार ५५४ पुगल बा कलेसे ८ लाख ६ हजार ७७८ जाने संक्रमणमुक्त हुइल बटै ।
मन्त्रालयके अनुसार हाल देशभर सक्रिय संक्रमितके संख्या ५ हजार ८९० जाने रहल बटै । जौन मन्से ५ हजार ६०१ जाने होम आइसोलेसनमे रहल बटै कलेसे २८९ जाने संस्थागत आइसोलेसनमे रहल बटै । कोरोनाके बिरामीमन्से ११८ जाने आईसीयू ओ ३४ जाने भेन्टिलेटरमे उपचाररत् बटै । ओस्टेक १० वर्ष टरेक ४ बालबालिकामे कोरोना संक्रमण पुष्टि हुइल बा कलेसे ११ से २० वर्ष उमेर समूहके ३० जाने कोरोना संक्रमित थपल बटै ।
