सुरक्षित आप्रवासनसम्बन्धी अन्तरक्रिया

पहुरा समाचारदाता
धनगढी, ३ पुस । धनगढीस्थित ट्रेस प्रालिसे सञ्चालित सुरक्षित आप्रवासन परियोजना÷सामी अन्तर्गत ‘अन्तर्राष्ट्रिय आप्रवासन दिसव’के पूर्वसन्ध्यामे सरोकारवालाहुकनसँग शुकके रोज धनगढीमे वैदेशिक रोजगारीसँग जोरल लाञ्चना तथा भेदभाव विषयक् अन्तरक्रिया कार्यक्रम हुइल बा ।

कार्यक्रममे सहभागीहुक्रे कौनो फेन व्यक्ति वा समूहहे कौनो आस्था, विचार, व्यवहार, काम, अवस्था आदिके आधारमे नकारात्मक दृष्टिकोणसे हेरना, आरोप लगैना, घृणा करना ओ अवमूल्यन करके लान्छना नैलगाइक परना बटैले बटैं ।

नेपाल सरकार ओ स्वीस सरकारबीचके द्विपक्षीय परियोजना अन्तर्गत हुइल कार्यक्रममे परियोजनामे कार्यक्रम संयोगक दीपक बोहरा वैदेशिक रोजगारीसँग जोरल लाञ्छना तथा भेदभावबारे कार्यपत्र प्रस्तुत करले रहैं ।

उहाँ वैदेशिक रोजगारीके कारण परिवार तथा आपवासीहुक्रे भोगे परल लाञ्छना तथा भेदभाव, सम्बन्धित व्यक्तिमे परना मनोसामाजिक असर, काहे लाञ्छना तथा भेदभाव हटैना जरुरी बा ?, कैसिक कम करे सेक्जाइ, लाञ्छना तथा भेदभावके कारणसे हुइना तनाव कम करना कुछ उपायके बारेमे जानकारी करैले रहैं ।

ओस्टेक, कार्यक्रममे संस्थाके लक्ष्मी चौधरी वैदेशिक आप्रवासनके बारेमे जानकारी करैले रहि । उहाँ सामाजिक लाञ्छना ओ सामाजिक विभेदहे कैसिक कम करे सेकजाइ कहिके जानकारी करैले रहि । कार्यक्रम धनगढी उपमहानगरपालिकाके कार्यवाहक नगरप्रमुख तथा वडा नम्बर १७ के वडाध्यक्ष माधव रानाके अध्यक्षतामे हुइल रहे ।