सुदूरपश्चिम पर्यटन साइकल यात्रा सुरु
पहुरा समाचारदाता
धनगढी, ३ पुस । सुदूरपश्चिम पर्यटन साइकल यात्रा २०७८ सुरु हुइल बा । साइकल यात्रामार्फत सुदूरपश्चिममे रहल पर्यटकीय सम्भावनाहे उजागर कैना उद्देश्यसे आज पुस ३ गतेसे सुदूरपश्चिम पर्यटन साइकल यात्रा २०७८ सुरु हुइल हो ।
साइकल यात्राके सुदूरपश्चिम प्रदेशके मुख्यमन्त्री त्रिलोचन भट्ट उद्धघाटन करल रहिट । प्रदेशको उद्योग, पर्यटन, वन तथा वातावरण मन्त्रालयके आयोजना ओ फारवेष्टर्न राइडरके सहकार्यमे पुस ३, ४ ओ ५ गतेसम साइकल यात्रा चल्ना बा ।
साइकल यात्रामे भारतके राइडरहुक्रनके फेन सहभागिता रहल बा । शनिच्चरके सकारे धनगढीसे गोदावरी, खानीडाडाँ हुइटी डोटीके बुडरसम साइकल यात्रामे गैल फारवेष्टर्न राइडर क्लबके अध्यक्ष भरत विक्रम शाह बटैलै । भारतके गाजियावाद, नैनीताल, बरेली ओ विहारके ८ जाने साइकल यात्रामे सहभागि रहल उहाँ बटैलै ।
ओस्टके नेपालके काठमाडौं, ललितपुर, नवलपरासी, भैरहवा, दाङ, बाँके ओ कञ्चनपुरसे फेन साइकल यात्री सहभागि रहल बाटै । यात्राके अन्तिम तथा टिसर दिन बुडरमे साइकल रेस प्रतियोगिता समेत आयोजना कैना तयारी रहल बा । निसर्ग अस्पतालके स्पोन्सरसीपमे आयोजना करल प्रतियोगिताके विजेताहे पुरस्कार समेतके व्यवस्था करल बा ।
डोटीके छतिवन तालसे महाकाली राजमार्गसमके ५ किलोमिटर दुरीमे आयोजना करजैना साइकल रेसके विजेताहे १५ हजार, उपविजेताहे १० हजार ओ तृतीयहे ५ हजार रुपैयाँ पुरस्कार निसर्ग अस्पतालसे स्पोन्सर करले बा ।
साइकल यात्रामे सहभागीहे टमान गाउँमे स्वागत करक लाग टमान सांस्कृतिक कार्यक्रम समेत राखल प्रदेश सरकारके उद्योग, पर्यटन, वन तथा वातावरण मन्त्रालयके पर्यटन विकास कार्यक्रम इकाइके निमित्त प्रमुख भोजराज पाठक बटैलै ।
