घोडाघोडीके वडा नम्बर ११ साक्षर घोषणा
पहुरा समाचार
पहलमानपुर, ५ पुस । कैलालीके घोडाघोडी नगरपालिका वडा नम्बर ११ सोमवार साक्षर वडा घोषणा करल बा । वडा भित्तर १५ से ६० उमेर समूहके ९५ प्रतिशत ढेर जनसंख्या साक्षर रहल पाइल ओरसे वडाहे साक्षर वडा घोषणा करल हो ।
सोम्मारके रोज एक कार्यक्रमके बीच नगरपालिकाके उपप्रमुख प्रेमकुमारी थापा यी वडाहे साक्षर वडा घोषणा करलि । कार्यक्रम वडा नम्बर ११ के वडाध्यक्ष दानसिंह जोगीके अध्यक्षतामे हुइल रहे ।
कार्यक्रममे नगर कार्यपालिका सदस्य निर्मला संज्याल, नेकपा एकीकृत समाजवादीके खडकबहादुर रावत, नेपाली काँग्रेसके राजकुमार कठरिया, नेकपा माओवादी केन्द्रके जीतेन्द्र कुवँर, जनता आधारभूत विद्यालयके प्रधानध्यापक तेजबहादुर खाती लगायत शुभकामना व्यक्त करले रहैं । ओस्टेक, कार्यक्रममे सामुदायिक सिकाई केन्द्रके संयोजक शिवप्रसाद ढकाल, सरोकारवाला, शिक्षक, विद्यार्थीहुकनके सहभागिता रहल रहे ।
वडा सदस्य शान्तिदेवी चौधरी स्वागत करल कार्यक्रममे सञ्चालन वडा सचिव प्रमोद कुश्मी करले रहैं । नगरे साक्षर घोषणा करना अभियान अन्तर्गत यीआघे वडा नम्बर १२, ३, ४, ५ ओ ९ वडाहे साक्षर वडा घोषणा करसेकल बा ।
