असुरक्षित बन्टी जिल्लाके पूर्वी क्षेत्र

पहुरा समाचारदाता
धनगढी, ६ पुस । कैलालीमे गैल कार्तिक २३ गते लम्कीचुहा नगरपालिका–१ के २३ वर्षीय भूपेन्द्र बडुवालके हत्या हुइल । आपराधिक समूहमे क्रियाशील व्यक्ति टीकापुर नगरपालिका–१ स्थित सिद्धार्थ होटल लग्गे ओहकान हत्या करल रहिट ।

घटनामे संलग्न रहल आरोपमे नौ जाने व्यक्ति पुर्पक्षके लाग कारागार चलान होसेकल बाटै कलेसे नौ जाने आभिनसम फरार रहल बाटै । भूपेन्द्रके हत्या हुइना एक अँठ्वार आघे किल टीकापुर नगरपालिका–८ कालिमाटीके १८ वर्षीय अनुप साउँदके हत्या हुइल रहे । भजनी नगरपालिका–३ थेकीपुरके १८ वर्षीय किरण साउँद हत्या करल रहिट ।

कालिमाटीमे डुनु जनहनके बीच झगडा हुइबर किरण अनुपहे चक्कु प्रहार करल रहिट । हत्या करुइया व्यक्तिहे प्रहरी तत्काल पक्राउ करल रहे । उ घटनाके एक अँठ्वारपाछे भूपेन्द्रके हत्या हुइल रहे । भूपेन्द्र बडुवाल हत्या काण्ड सेलाइ नैपैटी जिल्लाके पूर्वी क्षेत्रमे फेनसे औरे विभत्स हत्या हुइल बा । जानकी गाउँपालिका–९ के २५ वर्षीय अर्जुन दासके विभत्स हत्या करल हो । जिल्लाके पूर्वी क्षेत्रमे श्रृंखलावद्ध रुपमे हत्या हुइटी रहल बा ।

जिल्ला प्रहरी कार्यालय कैलालीके प्रहरी नायव उपरीक्षक वेदप्रकाश जोशीके अनुसार दासके हत्या जानकी गाउँपालिका वडा नम्बर ९ स्थित अमरावती सामुदायिक वनमे करिब १ किलोमिटरभिट्टर घाँटी रेटके कपार छिंगटाइल अवस्थामे भेटल बा ।

उहाँ कहलै, ‘रुख्वामे बाँधके नग्न बनाइल बा । डुनु हाठ समेत पाछे बाँधल बा । पाछे घाँटी रेटके छिंगटाइल डेखगैल बा ।’ सामान्य परिवारके दास पुस २ गते साँझ घरसे निकरल रहिट । रातके घर नै आइलपाछे दास पुस ३ गते दिनके स्थानीय घाँस कटुइया महिला शव डेखलवाछे प्रहरीहे खबर करल रहिट । प्रहरीके टोली अनुसन्धानमे जुटल बा ।

कैलालीके प्रहरी प्रमुख विश्व अधिकारीसहित प्रहरी टोली अनुसन्धानके लाग पुस ३ गते साँझके तालिम प्राप्त कुक्कुर सहित घटना स्थल पुगके फिर्ता हुइल रहिट । ओस्टके, प्रहरी मृतकके परिवारजनसे अडियो रेकर्ड फेला परले बा । उ अडियो रेकर्डबारे प्रहरी अनुसन्धान करटी रहल जनाइल बा । ‘हम्रे अनुसन्धानमे बाटी । डग स्निफिङ करैली । अडियो रेकर्डसहित कुछ क्लु फेला परल बा । हम्रे शंकास्पद व्यक्ति उप्पर अनुसन्धान बह्रैले बाटी ।’

स्थानीयके अनुसार मृतक दासके बाबा, डाइ ओ दादा भारतमे रोजगारीके लाग बैठ्टी आइल बाटै । उहाँ फेन भारत अइना जैना करटी आइल रहिट । करिब ३ अँठ्वार आघे उहाँ भारतसे आइल रहिट । यहाँ ओहकान गोसिनीया, छाइ ओ भौजी रहल रहिट ।

दुई जनहनके संवादमे हत्या स्वीकार

अर्जुन दासके विभत्स हत्यासंग सम्बन्धित प्रहरीहे मिलल् अडियोमे दुई व्यक्तिबीच सम्वाद हुइल बा । जौन, सम्वाद युवकके हत्यापाछे फोनमे करल हो । अडियो रेकर्डमे आपनहे मनोज नाउँसे चिन्हाइल युवक औरे व्यक्तिसंग घटनाके बारेमे बात करले बाटै । उहाँ घाँटी ओ शरीर अलग पारके कहले बाटै– ‘डाडु ओकर घाँटी अलग बा । शरीर अलग बा । एक÷दुई दिनभिटरे पता पाजैबी ।’

उहाँ हत्या कैके अपने रुपैडिया हुइटी भारतके बेंगलोरके लाग नेंगल सम्वादके क्रममे बटैले बाटै । प्रहरी उ अडियो रेकर्ड मनोजके गोसिनीयाके मोवाइलसे फेला पारल हो । ओहकान गोसिनीयाहे मेसेन्जरमे पठाइल जनाइल बा । प्रहरीके अनुसार आपनहे मनोज कहिके चिन्हुइया व्यक्ति मृतकके छिमेकी मनोज भण्डारी हुइट । उहाँ फरार रहल प्रहरी जनैले बा ।

घटनामे ४÷५ जनहनके संलग्नता रहल डेखगैल जिल्ला प्रहरी कार्यालयके प्रहरी नायब उपरीक्षक वेदप्रकाश जोशी बटैलै । उहाँ शंकास्पद् एक व्यक्ति पक्राउ परल ओ औरे जनहनके खोजी हुइटी रहल जानकारी डेलै । इहे बिच, मृतकके आफन्त ओ छिमेकी दोषी पक्राउके माग कैटी शव उठाइ नैडेहल हुइट । उहाँहुक्रे दोषीहे पक्राउ कैके कडा कारबाही कैना माग करले बाटै । पुस २ गतेसे सम्पर्कमे नैरहल दासके शनिच्चरके विभत्स रुपमे हत्या करल अवस्थामे शव फेला परल रहे । कुछ अँठ्वार आघे किल कैलालीके मोहन्यालमे घोडाघोडी नगरपालिका–१ जनकपुरके एक व्यापारीके हत्या हुइल रहे ।