बालविवाह अन्त्यके लाग रुपान्तरण कार्यक्रमके अनुगमन
बैतडी, ८ पुस । बैतडीमे बालविवाह अन्त्यके लाग बैतडीमे सञ्चालन हुइटी रहल रुपान्तरण कार्यक्रमके अनुगमन करल बा । जिल्लाके मेलौली नगरपालिकाके टमान स्थानमे सञ्चालित रुपान्तरण कक्षाके संयुक्त अनुगमन टोलीसे किशोरकिशोरीसंग अन्तरक्रिया करल हो ।
जिल्ला समन्वय समितिके प्रमुख सिद्धराज भट्टके नेतृत्वमे रहल अनुगमन टोलीमे वडा अध्यक्ष, नगरपालिकाके निमित्त प्रमुख प्रशासकीय अधिकृत, विद्यालयके शिक्षक, सञ्चारकर्मी लगायतके सहभागिता रहल रहे । संयुक्त राष्ट्रसंघीय जनसंख्या कोषके सहयोगमे भिएसओ ओ पिसवीनसे सञ्चालन कैटी रहल रुपान्तरण कार्यक्रमसे समाजमे परटी रहल प्रभावके बिषयमे अनुगमन करल पीसवीनके फिल्ड सुपरभाइजर कृष्णदत्त भट्ट बटैलै ।
बालविवाह अन्त्यके लाग टमान ठाउँमे सञ्चालन हुइल रुपान्तरण कक्षासे बालविवाह कम कैना महत्वपूर्ण भूमिका खेलल् जिल्ला समन्वय समितिके प्रमुख सिद्धराज भट्ट बटैलै । उहाँ कहलै, ‘किशोरकिशोरीनमे इ कार्यक्रमसे जागरण पैदा हुइल पाइल बा । जिहीसे किशोरकिशोरीनहे बालविवाहसे पर्ना समस्याके बारेम जानकार हुइ लागल बाटै । इहीसे बालविवाह अन्त्यके लाग सहयोग पुगी ।’
रुपान्तरण कार्यक्रम अन्तर्गत अब्बे जिल्लाके मेलौली नगरपालिका, सुर्नया गाउँपालिका ओ दोगडाकेदार गाउँपालिकामे किशोरकिशोरी रुपान्तरण कक्षा सञ्चालनमे रहल संयुक्त राष्ट्रसंघीय जनसंख्या कोषके जिल्ला कार्यक्रम अधिकृत गणेश शाही बटैलै । रुपान्तरण कक्षामे किशोरकिशोरी सहजकर्ताहुक्रे हरेक हप्ता टमान बिषयमे छलफल कैटी आइल उहाँ बटैलै ।
रुपान्तरण कक्षाके माध्यमसे किशोरकिशोरीहुक्रनके जीवनमे ढिउर परिवर्तन आइल दुर्गा मावि खलिगडाके प्रधानाध्यापक पदमराज जोशी बटैलै । उहाँ कहलै, ‘रुपान्तरण कक्षामे ढिउर जिवनोपयोगी शिक्षाके बारेमे छलफल हुइ । इहीसे किशोरकिशोरीहुक्रनके क्षमता अभिवृद्धिमे महत्वपूर्ण भूमिका खेल्ले बा ।’
