वित्तीय संस्था ओ थारु व्यवसायी

आज्कल बहुटसे गाउँमे लघुवित्त वित्तीय संस्थाके शाखा खुलल बा । समुह बनाके विना धितो रिन निकारे पैना हुइल ओर्से ढरे जन्हन लिरौसि हुइल बटिन । डोसर बाट समुहमे पुरुससे बह्रटा महिलन्के सहभागिताले महिलन्के हाँठेम पैसा बिल्गाइ लागल बटिन । थारु महिला फेन छोट बर व्यवसायी बने लागल बाटैं ।

इहे क्रममे इहे शनिच्चरकेघोडीघोडी लघुवित्त वित्तीय संस्थाके छठ्वा वार्षिक साधारण सभा धनगढीमे निम्जल बा । कार्यक्रममे संस्थाके अध्यक्ष प्रभातकुमार चौधरी यूनिक नेपाल लघुवित्त वित्तीय संस्थासे मर्ज हुइटी रहल ओरसे घोडीघोडी लघुवित्तके यी अन्तिम वार्षिक साधारण सभा रहल बटैलै । इ फेन फोहि बाट हो कि सुनसरीमे कार्यालय रहल ‘फरवार्ड’ नेपालमे सब्से ढेर सदस्य रहल लघुवित्त वित्तीय संस्था हो, जेकर अध्यक्ष थारु समुदायके भगवती चौधरी बटि ।

ओस्टक घोडीघोडी ओ यूनिक नेपालके मर्जके पाछे सुदूरपश्चिउँमेइ लघुवित्त वित्तीय संस्था सब्से भारि बनि । नेपाल राष्ट्र बैंक अगहन २९ गते पत्र पठाके एक महिनाभिटर संयुक्त कारोवार कैना कहले बा । इ डुनु लघुवित्त वित्तीय संस्थाके हालके अध्यक्ष थारु समुदायके रहल ओर्से मर्जके पाछे फेन स्वतः थारु अध्यक्ष हुइना डेखाइठ । यकर ढेरहस साधारण सदस्य ओ लाभान्वित समुह फेन थारु समुदाय जो बा ।

घोडीघोडी लघुवित्त वित्तीय संस्थाके प्रमुख कार्यकारी अधिकृत कुन्ना नारायण चौधरी संस्थाके प्रगतिबारे जानकारी डेहबेर कहले रहैं कि लगानी करुइया ५÷६ प्रतिशत व्याजडेना कहिके १२/१३ प्रतिशत पुगाइल । नेपाल राष्ट्र बैंकफे १८ प्रतिशतसे ढेर लेहे नइपैना कहिके निर्देशन जारी करल । पाछे आके १५ प्रतिशतमे झारल । उहेसे कहल हस नाफा कमाई नइसेकगैल।

असिक अधिकृत कुन्ना नारायण चौधरीके अन्सार लघुवित्त वित्तीय संस्था फेन ब्याज कमाइक लग औरे ओर्से लगानी खोज्ले रठैं । जेकर भपाई गाउँघरमे लगानी करल समुहसे उठैंठै । समान्य बैंकके तुलनामे लघुवित्त वित्तीय संस्थाके ब्याज बहुट ढेर बा । मने धरौटी ढारे नैपर्ना ओर्से निम्न बर्गिय किसानन् इहे सजिल लग्ठिन । खेटि किसानिम किल लागल थारु समुदायहे व्यवसायी बनैनामे वित्तीय संस्थाके फेन बरा हाँठ बा । मने बहुट जे घरखर्चक् लग किल रिन लेहल कारन आघे बह्रे नै सेक्ठुइट । थारु बाहुल्यता सन्चालक रहल वित्तीय संस्था रिन डेके असुलि किल कर्ना कामेम् किल ना लागिट । थारुन् ढेरसे ढेर व्यवसायी कसिक बनाइ सेक्जाइ कना ओर लागिट ।